ސިކުނޑިއަށް ޖެހޭ ނުރައްކާތެރި ބައްޔެއްކަމަށްވާ "ބްރެއިން އީޓިން އެމީބާ އިންފެކްޝަން" އިންޑިއާގެ ކެރެލާގައި ފެތުރެމުންދާތީ، އެ ސިޓީގައި ދިރިއުޅޭ ދިވެހިން ސަމާލުވުމަށް އެދެފިއެވެ. 

ކެރެލާގައި މި ނުރައްކާތެރި ބަލި ފެތުރެމުންދާތި އިންޑިއާގައި ހުންނަ ދިވެހި ރާއްޖޭގެ ކޮންސިއުލޭޓް ޖެނަރަލުން ނެރުއްވި ބަޔާނެއްގައި ބުނީ ސިކުނޑިއަށް ޖެހޭ ނުރައްކާތެރި ބައްޔެއްކަމަށްވާ "ބްރެއިން އީޓިން އެމީބާ އިންފެކްޝަން" ފެތުރެމުންދާކަމަށާއި އަދި ކެރެލާގައި ދިރިއުޅޭ ރައްޔިތުން އެކަމަށް ސަމާލުވުމަށް ކެރެލާގެ ސިއްހަތާ ބެހޭ ވުޒާރާތަކުން އިލްތިމާސްކޮށްފައިވާ ކަމަށެވެ.

ސިއްހަތާއި ބެހޭ ވުޒާރާތަކުން ހާމަކުރެއްވިގޮތުގައި މި ބަލީގެ އަލާމާތްތަކުގެ ތެރޭގައި ފިޓް ޖެހުމާއި ބޮލުގައި ރިއްސުމާއި ހުން އައުމާއި ހޮޑުލުމާއި ކަނދުރާގެ ނާރު އެރުމާއި ވާނުވާ ނޭނގުން ހިމެނޭކަމަށެވެ. އަދި މިފަދަ އަލާމަތެއް ފެނިއްޖެ ނަމަ، ލަސްނުކޮށް ޑޮކްޓަރަށް ދައްކަން ވަނީ އަންގައިފައެވެ.

ރާއްޖޭގެ ކޮންސިއުލޭޓް ޖެނަރަލުން ނެރުނު އިއުލާނުގައި ބުނީ ސިކުނޑިއަށް ޖެހޭ "ބްރެއިން އީޓިން އެމީބާ އިންފެކްޝަން" އެ ބައްޔަކީ ކަންފަތުން ނުވަތަ ނޭފަތުން ހަށިގަނޑު ތެރެއަށްދާ ޖަރާސީމަކަށްވާތީ ކޯރާއި ސްވިމިން ޕޫލް ފަދަ ތަންތަނަށް އެރުން ރައްކާތެރި ނޫން ކަމަށެވެ. އަދި އެފަދަ ތަންތަނަށް އެރޭނަމަ ރައްކާތެރިކަމުގެ ފިޔަވަޅު އެޅުމުގެ ގޮތުން ކަންފަތާއި ނޭފަތަށް ފެން ނޭޅޭގޮތަށް އިޔާބަޑް އަދި ނޭސަލް ކްލިބް ފަދަ ތަކެތި ބޭނުންކުރުމަށްވެސް އިލްތިމާސް ކޮށްފައިވެއެވެ.