މުދައްރިސުން ތަމްރީނު ކުރުމުގެ ޤައުމީ ޕްރޮގްރާމާ ގުޅޭ ގޮތުން ވިލާ އިންޓަރނޭޝަނަލް ހައި ސްކޫލުގެ ދަރިވަރުންނަށް މަޢުލޫމާތު ދިނުމުގެ ސެޝަނެއް ކުރިއަށްގެންގޮސްފިއެވެ.

އެ ސްކޫލުގެ ގްރޭޑް 11 ގައި ދަރިވަރުންނަށް ކުރިއަށްގެންދިޔަ މި ސެޝަން ނަންގަވައިދެއްވީ ޑެޕިއުޓީ މިނިސްޓަރ އާމިނަތު މާރިއާ އަދި ޑެޕިއުޓީ މިނިސްޓަރ ހުސައިން ޝިމާލްއެވެ.

މި ސެޝަންގައި މުދައްރިސުން ތަމްރީނުކުރުމުގެ ޕްރޮގްރާމް ކުރިއަށްދާނެ ގޮތާއި، އެ ޕްރޮގްރާމްގެ ދަށުން ދަރިވަރުންގެ ކިޔެވުން ރޭވިފައިވާ ގޮތުގެ މަޢުލޫމާތު ވަނީ ޙިއްޞާކޮށްފައެވެ.

މަތީ ޘާނަވީއަށް ކިޔަވައިދޭ ސްކޫލުތަކުން މިހާރު ދަނީ މި ޕްރޮގްރާމްގައި ބައިވެރިވާން ބޭނުންވާ ދަރިވަރުންގެ މަޢުލޫމާތު އެއްކުރަމުންނެވެ.

ދައްރިސުން ތަމްރީނު ކުރުމުގެ ޤައުމީ ޕްރޮގްރާމަކީ ތަޢުލީމަށް އިންޤިލާބީ ބަދަލެއް ގެނެއުމަށްޓަކައި އެކުލަވާލާފައިވާ "ތައިބަ" ޕްރޮޖެކްޓްގެ ތެރޭގައި ހިމެނިގެން ކުރިއަށްދާ ޕްރޮގްރާމެކެވެ.

"ތައިބަ" މި ޕްރޮޖެކްޓަކީ ގްލޯބަލް ޕާޓްނަރޝިޕް ފޮރ އެޑިޔުކޭޝަން (ޖީ.ޕީ.އީ)ގެ 9.5 މިލިއަން އެމެރިކާ ޑޮލަރުގެ މާލީއެހީއާއެކު މިނިސްޓްރީ އޮފް އެޑިޔުކޭޝަންގައި ޤާއިމުކުރެވިފައިވާ ޕްރޮޖެކްޓެކެވެ.