އިސްލާމިކް ޔުނިވަރސިޓީ އޮފް ދަ މޯލްޑިވްސް (އައި.ޔޫ.އެމް) އިން ބާއްވާ އިންޓަރނޭޝަނަލް ކޮންފަރެންސް އޮން އިންޓަލެކްޗުއަލް އެޑްވާންސްމަންޓް (އައި.ސީ.އައި.އޭ) ގެ ނުވަ ވަނަ ކޮންފަރެންސް ފެށުމުގެ ރަސްމިއްޔާތު، މިނިސްޓަރ ޑރ. އިސްމާޢީލް ޝަފީޢު ޝަރަފުވެރިކޮށްދެއްވައިފިއެވެ.

ދެ ދުވަހުގެ މުއްދަތަކަށް ކުރިއަށްގެންދާ މި ކޮންފަރެންސްގައި މިއަހަރު ރާއްޖެއާއި ރާއްޖެއިން ބޭރުގެ ބައިވެރިން ހިމެނޭހެން ޖުމްލަ 402 މީހުން ބައިވެރިވެފައިވެއެވެ. އަދި މި ކޮންފަރެންސްއަށް 113 ދިރާސާ ކަރުދާސް ހުށަހަޅާފައިވެއެވެ.

މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ޑރ. އިސްމާޢީލް ޝަފީޢު ވިދާޅުވީ ސައިންޓިފިކް ޢިލްމަކީ ތަޢުލީމުގެ އެންމެ މަތީ ހަރުފަތުގެ ބިންގާ ކަމަށާއި، އޭގެ ސަބަބުން ހަރުދަނާ ސިޔާސަތުތައް އެކުލަވާލުމަށް ވެސް ފަސޭހަވެގެންދާ ކަމަށެވެ. އަދި މި ކޮންފަރެންސްގެ ސަބަބުން ބައިވެރިންގެ ވިސްނުން މަތިވެ، އާ ޚިޔާލުތައް ނެރެވޭނެ ކަމުގެ ޔަޤީންކަން އޮތްކަމަށް މިނިސްޓަރ ވިދާޅުވިއެވެ.

މި ކޮންފަރެންސް ފެށުމުގެ ރަސްމިއްޔާތުގައި މިނިސްޓަރ ވަނީ އައިޔޫއެމްގެ ޕޯސްޓް ގްރެޖުއޭޓް ލައުންޖާއި، ދެ ރިސާޗް ޖާނަލް އިފުތިތާހުކޮށްދެއްވައިފަ އެވެ.