ދިވެހިރާއްޖެއިން ބެލްޖިއަމް އަށް ކަނޑައަޅުއްވާފައި ހުންނަވާ ސަފީރު އަލްފާޟިލާ ޤީލާ ޢަލީ، ބަހާމާސް އިން ބެލްޖިއަމް އަށް ކަނޑައަޅުއްވާފައި ހުންނަވާ ސަފީރު ހަރ އެކްސެލެންސީ ޝެރީލް ބަޒާޑް އާ މިއަދު ބައްދަލުކުރައްވައިފިއެވެ.
ބެލްޖިއަމްގައި ހުންނަ ބަހާމާސް އެމްބަސީގައި ބޭއްވި މި ބައްދަލުވުމުގައި، ގްލޯބަލް ސައުތުގެ ޤައުމުތަކުގެ ނާޒުކު ތިމާވެއްޓަށް ދިމާވަމުންދާ ގޮންޖެހުންތަކަށް ހައްލު ހޯދުމުގައި އެކުގައި މަސައްކަތްކުރުމުގެ މުހިންމުކަމަށް ދެ ސަފީރުންވެސް އަލިއަޅުއްވާލައްވާފައިވެއެވެ. އަދި ވަކިން ޚާއްސަކޮށް، ދިވެހިރާއްޖެ އާއި ބަހާމާސް އަކީ ފަތުރުވެރިކަމުގެ ސިނާއަތަށް ބަރޯސާ ވެފައިވާ އިޤްތިސޯދެއް އޮތް ގައުމެއްކަމުން، އިޤްތިސާދީ ދާއިރާއިން ގައުމުތަކަށް ކުރިމަތިވަމުންދާ ގޮންޖެހުންތަކާއި ގުޅޭގޮތުން މަޝްވަރާކުރެއްވިއެވެ.
މި ބައްދަލުވުމުގައި ސަފީރު ޤީލާގެ އަރިހުގައި ފަސްޓް ސެކްރެޓަރީ މުހައްމަދު ޝައްފާއު އިބްރާހިމް ބައިވެރިވެވަޑައިގަތެވެ.
