އިންޓަރނޭޝަނަލް ޔޫނިއަން ފޯރ ކޮންޒަރވޭޝަން އޮފް ނޭޗަރ (އައި.ޔޫ.ސީ.އެން.) އިން އަބޫދާބީގައި ބޭއްވި ވަރލްޑް ކޮންޒަވޭޝަން ކޮންގްރެސް އިފުތިތާހުކުރުމުގެ ރަސްމިއްޔާތުގައި ޚާރިޖީ ވަޒީރު، ޑރ. ޢަބްދުﷲ ޚަލީލް ބައިވެރިވެވަޑައިގެންފިއެވެ.

މި ރަސްމިއްޔާތުގައި ޕަލާއު ގެ ރައީސް ސުރަންގެލް ވިޕްސް ޖރ.، އެކުވެރި އަރަބި އިމާރާތުގެ މިނިސްޓަރ އޮފް ކްލައިމެޓް ޗޭންޖް އެންޑް އެންވަޔަރަމަންޓް ޑރ. އަމީނާ ބިންތި އަބްދުﷲ އަލް ދައްހަކް، ޕެނަމާގެ މިނިސްޓަރ އޮފް އެންވަޔަރަންމަންޓް ޚުއާން ކަރލޯސް ނަވާރޯ، އައި.ޔޫ.ސީ.އެން.ގެ ރައީސް ރަޒާން އަލް މުބާރަކް ތަޤްރީރުކުރެއްވިއެވެ. މީގެއިތުރުން މި ރަސްމިއްޔާތުގައި އަބޫ ދާބީ ގެ ވަލީ އަޙްދު ޝެއިޚް ޚާލިދު ބިން މުޙައްމަދު ބިން ޒައިދު އަލް ނަޙްޔާންވެސް ބައިވެރިވެވަޑައިގެންނެވިއެވެ.

އައި.ޔޫ.ސީ.އެން. އަކީ 1400 އަށްވުރެ ގިނަ މެމްބަރު ޖަމްޢިއްޔާތަކާއި 1700 އަށްވުރެ ގިނަ ތަޖުރިބާކާރުން ހިމެނޭ، ދުނިޔޭގެ އެންމެ ބޮޑު އެއް ތިމާވެށީގެ ނެޓްވަރކްއެކެވެ. މި ޖަމުޢިއްޔާގެ ސްޓޭޓް މެމްބަރަކަށް ދިވެހިރާއްޖެ ވެފައިވަނީ 2022 ވަނަ އަހަރެވެ.

މި ބައްދަލުވުމުގައި މައިގަނޑު ގޮތެއްގައި އަލިއަޅުވާލާފައިވަނީ މުހިންމު ފަސް ދާއިރާއަކަށެވެ. އެއީ މޫސުމަށް އަންނަ ބަދަލުތަކާ ގުޅޭ މައްސަލަތަކާއި، ބަޔޯޑައިވަރސިޓީ ރައްކާތެރިކުރުމާއި، އިޖްތިމާޢީ-އިޤްތިޞާދީ ގޮންޖެހުންތަކަށް ހައްލު ހޯދުމާއި، ތިމާވެށި ހިމާޔަތްކުރުމުގެ މަސައްކަތްތައް ހަރުދަނާކުރުމާއި މޫސުމީ ބަދަލުތަކުގެ ނޭދެވޭ އަސަރުތައް ކުޑަކުރުމެވެ.