މިސްރުގެ ފޮރިން މިނިސްޓަރު ޑރ. ބަދުރު އަބްދުއްލަތީ (ކ)، ފޮރިން މިނިސްޓަރު ޑރ. އަބްދުﷲ ޚަލީލް / ފޮޓޯ: މިނިސްޓްރީ އޮފް ފޮރިން އެފެއާޒް
ފޮރިން މިނިސްޓަރު ޑރ. އަބްދުﷲ ޚަލީލް މިސްރުގެ ފޮރިން މިނިސްޓަރު ޑރ. ބަދުރު އަބްދުއްލަތީ އާ މިއަދު ބައްދަލުކުރައްވައިފިއެވެ.
މިނިސްޓަރ އޮފް ފޮރިން އެފެއާޒް ޑރ. އަބްދުالله ޚަލީލް ރަސްމީ ދަތުރުފުޅެއްގައި މިސްރަށް ފުރާވަޑައިގަތީ މި މަހު 16 ވަނަ ދުވަހުއެވެ. މި ދަތުރުފުޅުގައި ފޮރިން މިނިސްޓަރު ޑރ. ޚަލީލް މިސްރުގެ ފޮރިން މިނިސްޓަރު ޑރ. ބަދުރު އަބްދުލައްތީ އާ ރަސްމީ މަޝްވަރާތަކެއްކޮށް، ރާއްޖެއާއި މިސްރާ ދެމެދު އޮތް އެކުވެރިކަމާއި އެއްބާރުލުމުގެ ދިގުދެމިގެންދާ ގުޅުން މުރާޖަޢާ ކުރައްވާނެކަމަށް މިނިސްޓްރީން ބުނެފައިވެއެވެ. މިނިސްޓްރީން އިތުރަށް ބުނެފައިވަނީ ތަޢުލީމާއި ސިއްޙަތާއި ވިޔަފާރިއާއި ޞަޤާފީ ކަންކަމާއި ގުޅޭގޮތުން މަޝްވަރާކޮށް ދެފަރާތުގެ ޝައުގުވެރިކަން ހުރި ދާއިރާތަކުން އެއްބާރުލުން ދިނުމަށް އާ މަގުތަކެއް ވެސް ދެ މިނިސްޓަރުން ހޯއްދަވާނެ ކަމަށެވެ.
އެގޮތުން މިއަދު ކުރިއަށްގެންދިޔަ ބައްދަލުވުމުގައި ބޮޑަށް އަލިއަޅުވާލާފައިވަނީ ދިގު ދެމިގެންދާނެހެން ދެ ޤައުމުގެ ގުޅުން އިތުރުކުރުމާއި، ދެ ޤައުމުގެ ކުރިއެރުމަށް އާ މަގުތަކެއް ހޯދުމާއި ގުޅޭގޮތުންނެވެ.
މީގެ އިތުރުން މިނިސްޓަރ ޑރ. ޚަލީލް ވަނީ މިސްރު ސަރުކާރުގެ އިސް އޮފިޝަލުންނާ ބައްދަލުކުރައްވައި ދެ ގައުމުގެ އެއްބާރުލުން އިތުރަށް އިތުރުކޮށް އިސްކަންދޭ ދާއިރާތަކުގެ ޕާޓްނަޝިޕް ފުޅާކުރެވޭނެ ގޮތްތަކާ ބެހޭ ގޮތުން މަޝްވަރާ ކުރައްވަން ހަމަޖެހިފައެވެ.
މި ދަތުރުފުޅަކީ މިޞްރާއެކު ގުޅުން ބަދަހިކުރުމަށް، އަދި ބައިލެޓަރަލް އަދި މަލްޓިލޭޓަރަލް ފެންވަރުގައި ހިއްސާކުރެވޭ މަސްލަހަތުތައް ކުރިއެރުވުމުގައި ގުޅިގެން މަސައްކަތްކުރުމަށް ރާއްޖެއިން ކުރާ ވަޢުދުތަކުގެ މައްޗަށް އަލިއަޅުވާލާ ދަތުރެކެވެ.
