އޮކްޓޫބަރު 18, 2025 ގައި ބާ އަތޮޅުގައި ބޭއްވި ބާނީ އިވެންޓްގައި އެއްފަހަރާ އެންމެ ގިނަ މީހުން ސްނޯކްލިންގެ އާ ގިނިސް ވޯލްޑް ރެކޯޑެއް ކާމިޔާބުކަމާއެކު ރާއްޖެ އިން ޤާއިމްކޮށްފިއެވެ. މި ހަރަކާތުގައި ޖުމްލަ 623 ސްނޯކްލަރުން ބައިވެރިވެފައިވެއެވެ.

ބާ އަތޮޅު ކައުންސިލުން ވިޒިޓް މޯލްޑިވްސް ކޯޕަރޭޝަން (ވީއެމްސީ) އާއި ގުޅިގެން އިންތިޒާމްކުރި މި ރެކޯޑް މުގުރާލުމުގެ ހަރަކާތުގައި ރާއްޖޭގެ އެކި ކަންކޮޅުތަކުން މަންދޫބުންނާއެކު 13 ރަށަކާއި 15 ރިސޯޓަކުން ބައިވެރިވެފައިވެއެވެ.

ރެކޯޑް މުގުރާލި ސްނޯކްލިންގެ މި ހަރަކާތް ފެށިފައިވަނީ 16:30 ގައެވެ. އަދި ގަޑިއިރެއްހާއިރަށް ދެމިގެންދިޔަ މި ހަރަކާތް ނިންމުމަށް ބޭއްވި ރަސްމިއްޔާތުގައި ބާ އަތޮޅު ކައުންސިލަށް ގިނިސް ވޯލްޑް ރެކޯޑްސްގެ އޮފިޝަލް އެޑްޖުޑިކޭޓަރަކު މި ފިލާ ހަވާލުކޮށްދެއްވާފައިވެއެވެ.

މި ތާރީޚީ ކާމިޔާބީގެ އަގުވަޒަންކުރުމުގެ ގޮތުން ވީއެމްސީގެ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރު އިބްރާހިމް ޝިއުރީ ވަނީ ބާ އަތޮޅު ކައުންސިލަށް ހަނދާނީ ފިލާއަކާއި ފައިސާ ފޮއްޗެއް ހަވާލުކޮށްފައެވެ.