ޤައުމީ ދިފާޢީ ބާރު އިތުރަށް ވަރުގަދަކުރުމަށް ޓަކައި މުހިންމު ހުރިހާ ދާއިރާއެއް ތަރައްޤީ ކުރުމަށް މަސައްކަތް ފަށާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިފަދައިން ވިދާޅުވީ ސަރުކާރަށް ދެ އަހަރު ފުރުން ފާހަގަކުރުމުގެ ގޮތުން ބާއްވާ ހަފްތާ 104 ފާހަގަކުރުމުގެ ރަސްމިއްޔާތުގައި ވާހަކަފުޅުދައްކަވަމުންނެެވެ. 

މިކަމުގެ މުހިންމުކަން ފާހަގަކުރައްވާ ރައީސުލްޖުމްހޫރިއްޔާ ވިދާޅުވީ ޤައުމީ ދިފާއީ ބާރުގެ ގާބިލުކަން އިތުރުކުރުމަކީ ރާއްޖޭގެ މިނިވަންކަމުގެ ފަލަ ރަތް ރޮނގު ދިފާއުކުރުމަށް ކޮންމެހެން ކުރަންޖެހޭ މަސައްކަތެއް ކަމުގައެވެ.

އެގޮތުން ކޯސްޓު ގާޑުގެ ފުލީޓު ދެގުނަ ބޮޑުކުރުމާއި، މެރިން ކޯހުގެ ކެޕޭސިޓީ ބޮޑުކުރުމާއި، އެއާ ކޯ އުފައްދައި އެއާކޯއަށް ކެޕޭސިޓީ އިތުރުކުރުން ފަދަ މަސައްކަތްތައް ކުރެވިފައިވާކަމަށް ރައީސް ފާހަގަކުރެއްވިއެވެ. ރައީސް އިތުރަށް ވިދާޅުވީ އިހަށް ދުވަހު އެމްއެންޑީއެފްގެ އެއާ ސްޓޭޝަނެއް ރާއްޖޭގެ އެންމެ ދެކުނުގައި، އައްޑޫގައި ހުޅުވިގެންދިޔަ ކަމަށާއި ރާއްޖޭގެ އުތުރުގައި ވެސް އެ މަސައްކަތް ކުރެވެމުންދާ ކަމަށެވެ.

އަދި ރާއްޖޭގެ ކަނޑުގެ ސަރަހައްދާއި ވައިގެ ސަރަހައްދު ބެލެހެއްޓުމުގެ ކެޕޭސިޓީ ބޮޑުކުރުމަކީ، ދިވެހި ހުރިހާ ރައްޔިތުންވެސް ބޭނުންވާނެ ގޮތް ކަމަށް ފާހަގަކުރައްވާ ރައީސް ވިދާޅުވީ މިލިޓަރީ ވަރުގަދަކުރުމަކީ ޒިންމާއެއް ކަމަށާއި، ދިވެހީންނަކީ ނިކަމެތި ބައެއްކަމަށް ދުށުމަކީ ވިސްނުމުގައި ހުރެގެންވާނެ ކަމެއް ކަމުގައި ޤަބޫލު ނުކުރައްވާކަމަށެވެ.

ހަމައެހެންމެ ދިފާއީ ގޮތުން ރާއްޖޭޭގެ ވިއުގަ ވަރުގަދަކުރުމަށް ސިފައިންގެ ގާބިލުކަން އިތުރުކުރުމާއެކު އެހެނިހެން ގައުމުތަކާއެކު މަސައްކަތް ކުރައްވަމުންދާކަމަށް ވެސް ރައީސް ފާހަގަކުރެއްވިއެވެ.