މި ސަރުކާރަށްވުރެ ބޮޑަށް ނޫސްވެރިންނަށް ފުރުސަތުދޭ އެހެން ސަރުކާރަކުން ނެތްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ މާފަންނުގެ ރައްޔިތުންނާ ބައްދަލުކުރެއްވުމަށް ރޭ ބޭއްވި ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބުދެއްވަމުންނެވެ.
އެގޮތުން ރައީސް ވިދާޅުވީ ނޫސްވެރިންގެ ސުވާލުތަކަށް ޖަވާބު ދިނުމަށް ކޮންފެރެންސްއެއް ބާއްވާފައިވާނެކަމަށެވެ. އަދި މި ކޮންފެރެންސްގައި ނޫސްވެރިންގެ ސުވާލުތައް ހުސްވެ ދެން އިތުރަށް ސުވާލެއް ނެތްކަމަށް ވިދާޅުވަންދެން ހުންނެވިކަމަށް ވެސް ރައީސް ފާހަގަކުރެއްވިއެވެ. ކުރިއަށް އޮތްތާގައި ވެސް މިފަދަ ނޫސްވެރިންގެ ބައްދަލުވުންތައް ބާއްވާނެކަމަށް މި ފުރުސަތުގައި ރައީސް ފާހަގަކުރެއްވިއެވެ.
ސުވާލަށް ޖަވާބުދެއްވަމުން ރައީސް އިތުރަށް ވިދާޅުވީ ނޫސްވެރިކަމަކީ އެހެން ދާއިރާތައް ފަދައިން ވަރަށް ޕްރޮފެޝަނަލްކޮށް ހިންގަންޖެހޭ ދާއިރާއެއްކަމަށެވެ. އަދި ނޫހެއްގެ އެޑިޓޯރިއަލް ޕޮލިސީއަކީ ސަރުކާރާ ދެކޮޅުވުންކަން އިއުލާނުކުރުމާއެކު އެ ނޫހެއްގެ ޕްރޮފެޝަނަލިޒަމް ގެއްލޭނެކަމެއްކަމަށް ވެސް ވިދާޅުވިއެވެ.
މީގެ އިތުރަށް ރައީސް ފާހަގަކުރެއްވީ، މީޑިޔާ ގާނޫނުގެ ދަށުން ވުޖޫދުވި މީޑިޔާ ކޮމިޝަނުން މިހާތަނަށް މީޑިޔާއަކާމެދު ފިޔަވަޅެއް އެޅިކަން އެނގިވަޑައިނުގަންނަވާކަމަށެވެ. އަދި މި ސަރުކާރުން ތަންމިނަށް ނޫސްވެރިކަމުގެ މިނިވަންކަން ފޯރުކޮށްދީފައިވާ ކަމަށާއި، ހަމައެކަނި ނެތްކަމަކީ ގާނޫނުއަސާސީއާ ޚިލާފުވެ އިސްލާމްދީނާ ޚިލާފު ވާހަކަދެއްކުގެ އިތުރުން މީހުންގެ އަބުރަށް އަރައިގަތުން ކަމަށް ވިދާޅުވިއެވެ.
