މުޅި ރާއްޖެ ފެރީގެ ނިޒާމުން ގުޅައިލުމަށް އެމްޓީސީސީން ހިންގާ ރާއްޖެ ޓްރާންސްޕޯޓް ލިންކް (އާރްޓީއެލް) ނިޒާމުގެ ތެރެއިން، ނ. އަތޮޅުގައި ފެރީގެ ޚިދުމަތް އިފުތިތާހުކޮށްފިއެވެ.

މި ޚިދުމަތް އިފުތިތާހު ކުރުމަށް ނ. މަނަދޫގައި ބޭއްވި ރަސްމިއްޔާތު ޝަރަފުވެރިކޮށްދެއްވާ، އާރްޓީއެލް ފެރީގެ ޚިދުމަތް އިފްތިތާހުކޮށްދެއްވީ ލޯކަލް ގަވަމަންޓް މިނިސްޓަރު އާދަމް ޝަރީފް އުމަރެވެ. އަރިހުގައި ޓްރާންސްޕޯޓް މިނިސްޓަރު މުހައްމަދު އަމީނާއި އެންވަޔަރަމަންޓް މިނިސްޓަރު ތޯރިގު އިބްރާހީމް ވަނީ ބައިވެރިވެވަޑައިގެންފައެވެ.

މި ރަސްމިއްޔާތުގައި އެމްޓީސީސީގެ ސީއީއޯ އަބްދުﷲ ޒިޔާދުގެ އިތުރުން ރައްޔިތުންގެ މަޖިލީހުގައި ނ. އަތޮޅަށް ނިސްބަތްވާ ދާއިރާތަކުގެ މެންބަރުން ވެސް ބައިވެރިވެވަޑައިގެންފައިވެއެވެ.

ނ. އަތޮޅަށް ހާއްސަކޮށް އާރްޓީއެލް ފެރީގެ ގޮތުގައި އަދި ބޭނުން ކުރާނީ ދެ ލޯންޗް ފެރީއެވެ. މި ދަތުރުތައް ފެށުމަށް މީގެ ކުރިން ވަނީ ޓެސްޓް ބުރު ވެސް ބާއްވާފައެވެ.

އެމްޓީސީސީން ބުނީ، މިއަދުން ފެށިގެން އަންނަ މަހުގެ 1 ވަނަ ދުވަހާއި ހަމައަށް އާރްޓީއެލްގެ ފެރީގެ ދަތުރުތައް ކަސްޓަމަރުންނަށް ފޮރުކޮށްދޭނީ ހިލޭ ކަމަށެވެ. އަދި އޮގަސްޓް މަހުގެ 2 ވަނަ ދުވަހުން ފެށިގެން ދަތުރުތަކަށް ފައިސާ ނަގާނެ ކަމަށް ވަނީ ބުނެފައެވެ.

ޒޯން 2ގެ ނ. އަތޮޅުގެ އާރްޓީއެލް ފެރީ ހިދުމަތް ހަފްތާއަކު ހަތް ދުވަހު، ދެ ފެރީ މެދުވެރިކޮށް، 3 ރޫޓަކުން ލިބިވަޑައިގެންނަވާނެ ކަމަށް ވެސް އެމްޓީސީސީން ބުނެއެވެ.

އާރްޓީއެލް ފެރީގެ ޚިދުމަތް މިހާރު ޖުމްލަ 4 ޒޯނަކަށް އެމްޓީސީސީ އިން ދެއެވެ. އެއީ ޒޯން 1 ގައި، ހއ. ހދ. އަދި ށ. އަތޮޅާއި، ޒޯން ދޭއްގައި ނ. ޅ. އަތޮޅު އަދި ޒޯން 5 ގައި ގއ. އާއި ގދ. އަތޮގެ އިތުރުން އަދި ޒޯން 6 ގައި ފުވައްމުލައް އަދި އައްޑޫ އަތޮޅެވެ.

ކުރީގެ ރައީސް އިބްރާހީމް މުހައްމަދު ސޯލިހްގެ ވެރިކަމުގައި އާރްޓީއެލްގެ ހިދުމަތް ރަސްމީކޮށް ފެށީ 2022 ވަނަ އަހަރުގެ ޖޫން މަހުގެ 12 ވަނަ ދުވަހުއެވެ.

ގައުމީ ފެރީ ނިޒާމުގެ ދަތުރުތަކުގައި ރަށްތައް ގުޅާލުމަށް ނިންމާފައިވަނީ ކޮމިއުޓް ލިންކާއި ނަން-ކޮމިއުޓް ލިންކް އަދި ހައިވޭ ލިންކުތަކުންނެވެ.