ހއ. މާރަންދޫ ކައުންސިލްގެ ނައިބު ރައީސް، އަހުމަދު ރަމީޒު
ހއ. މާރަންދޫ ކައުންސިލްގެ ނައިބު ރައީސް، އަހުމަދު ރަމީޒު ކުއްލި ގޮތަކަށް އަވަހާރަވެއްޖެއެވެ.
ރަމީޒު ކުއްލި ގޮތަކަށް އަވަހާރަވީ އެރަށުގައި އެކުވެރި ކަމުގެ ފުޓްބޯޅަށް މެޗެއް ކުޅެމުން ދަނިކޮށް ހާލު ދެރަވެގެންކަމަށް މާރަންދޫ ކައުންސިލުން މައުލޫމާތުދެއެވެ.
"ހަޅަ" އަށް މައުލޫމާތު ދެމުން އެކައުންސިލްގެ އެސްޖީ ވިދާލުވީ ރަމީޒު ނިޔާވީ އެރަށުގައި އެކުވެރިކަމުގެ މެޗެއް ކުޅެމުން ދަނިކޮށް ކަމަށެވެ. ނަމަވެސް ނިޔާވިކަން ކަށަވަރުވީ ފަރުވާ ދިނުމަށް ހޮސްޕިޓަލަށް ގެންދިއުމުންކަމަށެވެ. ރަމީޒު ދަނޑުމަތީ ކުޅެން ހުއްޓާ ކުއްލިއަކަށް ހާލުދެރަވެ ހޮޑުލެވި ބައެއްކަހަލަ ކަންކަން ދިމާވި ކަމަށާއި އަދި ވަގުތުން ސީޕީއާރް ދީފައިވާކަމަށްވެސް އެކައުންސިލްގެ އެސްޖީ ވިދާޅުވިއެވެ.
މާރަންދޫ ކައުންސިލްގެ އެސްޖީ އިތުރަށް ވިދާޅުވީ ރަމީޒުއަށް އިތުރުފަރުވާ ދިނުމައްޓަކައި ދިއްދޫ ހޮސްޕިޓަލައް ގެންގޮސްފައިވާކަމަށެވެ. ނަމަވެސް ދިއްދޫ ހޮސްޕިޓަލުން ބުނެފައިވަނީ ރަމީޒު ހޮސްޕިޓަލަށް ގެނައި އިރުވެސް އަވަހާރަވެފައިވާ ކަމަށެވެ.
