މޯލްޑިވިއަންއަށް ވައިޑް ބޮޑީ އެއަރކްރާފްޓެއް ތައާރަފްކުރުމަށް މޯލްޑިވިއަންއާއި ޓްރޫނޯޑްއާއި ދެމެދު އެއްބަސްވުމުގައި ސޮއިކުރުމުގެ ރަސްމިއްޔާތުގައި މިނިސްޓަރ މުހައްމަދު އަމީން ބައިވެރިވެވަޑައިގަންނަވައިފިއެވެ.

މޯލްޑިވިއަންއާއި ޓްރޫނޯޑްއާއި ދެމެދު އެއްބަސްވުމުގައި ސޮއި ކޮށްފައިވަނީ ހުކުރު ދުވަހުގެ ހަވީރު ވެލާނާ އިންޓަނޭޝަނަލް އެއަރޕޯޓްގެ ހުވަނދުމާ ލައުންޖްގައި ބޭއްވި ޚާއްސަ ރަސްމިއްޔާތެއްގައެވެ.  

  މޯލްޑިވިއަންގެ ފްލީޓަށް ވައިޑް ބޮޑީ ތައާރަފް ކުރުމަކީ ރައީސުލްޖުމްހުރިއްޔާ ޑރ. މުހައްމަދު މުޢިއްޒުގެ ރިޔާސީ ވައުދުފުޅެކެވެ. އެގޮތުން އެމަނިކުފާނުގެ ވައުދުފުޅު ފުއްދެވުމުގެ ގޮތުން މޯލްޑިވިއަން އިން މިހާރު މިވަނީ A330-200 މަރުކައިގެ މަތިންދާބޯޓެއް ގެނައުމަށް ނިންމާފައެވެ. މޯލްޑިވިއަންގެ ފްލީޓަށް A330-200 ގެ މަތިންދާބޯޓް ތައާރަފްކުރުމުން އެއަރލައިންގެ އޮޕަރޭޝަނަލް ކެޕޭސިޓީ ވަރަށް ބޮޑު ތަނުން އިތުރުވެގެންދާނެއެވެ. މިއަހަރުގެ ފަހުކޮޅު ރާއްޖެ ގެންނަ މި މަތިންދާބޯޓުގައި އެއްފަހަރާ 200 އަށް ވުރެ ގިނަ ފަސިންޖަރުން އުފުލޭނެއެވެ.  

 މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ މުހައްމަދު އަމީން ވިދާޅުވެފައިވަނީ ވައިޑް ބޮޑީ މަތިންދާބޯޓުގެ ދަތުރުތައް ފެށުމާއިއެކު ފަތުރުވެރިކަމުގެ ދާއިރާއަށާއި ރާއްޖޭގެ އިޤްތިސާދަށް ބޮޑެތި ބަދަލުތަކެއް އަންނާނެކަމަށެވެ. އެގޮތުން މީހުން އުފުލޭ މިންވަރު އިތުރުވެ ރާއްޖެ އަންނަ ފަތުރުވެރިންގެ އަދަދާއި އެއިން ލިބޭ މާލީ މަންފާ އިތުރުވާނެކަމަށް މިނިސްޓަރ ވިދާޅުވިއެވެ.    

މިއަހަރުގެ ފަހުކޮޅު A330-200 ގެ ދަތުރުތައް ފަށާއިރު އެންމެ ފުރަތަމަ ދަތުރުތައް ފަށާނީ ޗައިނާއަށެވެ. އަދި މުސްތަޤްބަލުގައި ޔޫރަޕާއި އެފްރިކާގެ ޤައުމުތަކަށް ދަތުރުތައް ފެށޭނެ ކަމަށް މޯލްޑިވިއަން އިން މަޢުލޫމާތު ދެއްވައެވެ.