މިނިވަން ކަމަށް ލޮޅުމެއް ނާންނަ މިންވަރަށް ދާޚިލީ ސަލާމަތާ ގުޅޭ ކަންކަން ބައްޓަންކުރައްވާނެ ކަމަށް ދާޚިލީ ސަލާމަތާ ފަންނިއްޔަތާއި ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
މިނިސްޓަރ މިހެން ވިދާޅުވީ، ހޭޔަނބޯ ޕްރޮގްރާމުގެ ޚައްސަ މެހެމާނެއްގެ ގޮތުގައި ބައިވެރިވެވަޑައިގެން ވާހަކަ ދައްކަވަމުންނެވެ.
މި ޕްރޮގްރާމުގައި ވާހަކަ ދައްކަވަމުން މިނިސްޓަރ ވިދާޅުވީ އައު ސަރުކާރު އުފެދިގެން އައިއިރު ވަޒީރުކަން ކުރުމުގެ ފުރުޞަތު ލިބުމުން އެކަމަށް ނިކުންނެވީ ކަމަށެވެ.
ވަޒީރު އިހުސާން ވިދާޅުވީ ދަޚިލީ ސަލާމަތާއިގުޅޭ ކަންކަމަކީ ރާއްޖޭގައި އިސްލާޙުކުރަންޖެހޭ ގިނަ ކަންތައްތަކެއް ހުރި ގޮންޖެހުން ބޮޑު އެއް ދާއިރާ ކަމަށެވެ. އަދި މި ދާއިރާގައި ހުރި މައްސަލަތަކަށް އަވަސް ހައްލެއް ނުގެނެވިއްޖެނަމަ، ރާއްޖޭގެ މިނިވަންކަމަށް ލޮޅުން އައިސްދާނެފަދަ ކަންކަންވެސް ހިމެނޭކަން ވަޒީރު ފާހަގަކުރެއްވިއެވެ.
ދާޚިލީ ވަޒީރު ވިދާޅުވީ ދާޚިލީ ކަންކަމާ ގުޅޭ ނިންމުންތައް ނިންމާއިރު އެއްގޮތަކަށްވެސް ހުރިހާ އެންމެން ހިތްހަމަ ޖެހޭގޮތަށް ނިންމުންތައް ނިންމެން ނޯންނަކަމަށާއި ނަމަވެސް އެއީ ކުރަންޖެހޭ މުހިއްމު ކަންތައްތަކެއްކަން ވަޒީރު ފާހަގަކުރެއްވިއެވެ.
އެގޮތުން ހަމައެކަނި ވަޒީރަކަށް ކަންކަން ނިންމެން ނޯންނައިރު ދާޚިލީ ދާއިރާގެ މައްސަލަތައް ނިންމަވަނީ ރައީސުލްޖުމްހޫރިއްޔާ އިރުޝާދު ދެއްވާ ގޮތަށް ކަމަށާއި ވަޒީރުގެ ހައިސިއްޔަތުން އެންމެ އިސްކަންދޭންޖެހޭ މުހިއްމު ކަންކަން ތަންފީޒު ކުރައްވަމުން ގެންދަވާކަން މިނިސްޓަރ ފާހަގަކުރެއްވިއެވެ. އަދި ޤައުމެއްގެ ވެރިއެއްގެ އަޒުމް ވަރުގަދަވެއްޖެނަމަ ކުރައްވާ މަސައްކަތް ކާމިޔާބުވާނެ ކަމަށް ވަޒީރު ވިދާޅުވިއެވެ.
އަދި ދައުލަތުގެ މުޢައްސަސާއެއްގައި ފެންވަރުގައި މަސައްކަތް ކުރާއިރު ވަފާތެރިކަމާއި ނަޒާހަތްތެރިކަމާއި ޚިދުމަތްތެރިކަން ވަރަށް މުހިންމު ކަމަށްވެސް ވަޒީރުގެ ވާހަކައިގައި ވިދާޅުވިއެވެ.
