މިހާރު މަސްކިރާތާ ދެ ހަފުތާތެރޭ މަސްވެރިންނަށް ފައިސާ ދެމުންދާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

އެސްއެސްޓީވީގެ ބާރު ހަތަރެއް ޕްރޮގްރާމުގައި ވާހަކަދައްކަވަމުން ވަޒީރު ޝިޔާމު ވިދާޅުވީ، މިފްކޯއަށް މަސްވެރިން މަސްކިރާތާ 2 ހަފްތާތެރޭގައި ފައިސާ ދެއްކޭނެ އިންތިޒާމެއް ހަމަޖައްސައި އެގޮތަށް ގަވާއިދުން ފައިސާ ދެމުން ދާކަމަށެވެ.

މަސްވެރިންނަށް ކުރިމަތިވާ ދަތިތައް ހައްލުކުރުމަށް، މަސްވެރިންގެ ހާލު ގާތުން ބައްލަވަމުންގެންދަވާ ވަޒީރު އިތުރަށް ވިދާޅުވީ، މި ސަރުކާރުން މަސްވެރިންނަށް ފައިސާ ދޭން އަމާޒުކޮށްފައިވާ މުއްދަތުގައި ފައިސާ ނުދެވުމުގެ މައިގަނޑު ސަބަބަކަށްވީ ދުނިޔޭގެ ބާޒާރުގައި މަހުގެ އަގަށް އައި ބަދަލުތައް ކަމުގައެވެ.

އެގޮތުން، ކުރީ ސަރުކާރުން ސިޔާސީ މަންފާއަށް މަސް ގަންނަ އަގު 25 ރުފިޔާއަށް ބޮޑުކުރި އިރު އެ ސަރުކާރަށްވެސް މަސްވެރިންނަށް ދޭންޖެހޭ ފައިސާ ނުދެވި އޮތްކަމަށް ވަޒީރު މައުލޫމާތުދެއްވިއެވެ. ހަމައެހެންމެ ކުރީ ސަރުކާރުން ނިންމި ނިންމުމުގެ ސަބަބުން މިފްކޯގެ ބްރޭކް އީވެން 12 ރުފިޔާއާއި ގާތަށްވެސް ނާންނަކަމަށް ވަޒީރު ވިދާޅުވިއެވެ.

އަދި މީގެ އިތުރުން، މަސްވެރިންނަށް ނުދެވި ހުރި ހުރިހާ ފައިސާއެއް ހަލާސްކޮށް، ބެކްލޮގް ކްލިއަރ ކޮށްފައިވާކަމަށާއި، 48 ގަދީރުތެރޭ މަސްވެރިން ކިރާ މަހަށްވާ ފައިސާ މަސްވެރިންނަށް ލިބޭނެ ގޮތް ހެދުމަށްޓަކައި މާކެޓަށް ނެރޭ ޕްރޮސެސްކޮށްފައިވާ މަހުގެ އުފެއްދުންތައް އިތުރުކުރަން ސަރުކާރުން ގިނަ މަސައްކަތްތަކެއް ކުރައްވަމުން ގެންދަވާކަން ވަޒީރުގެ ވާހަކަފުޅުގައި ފާހަގަކުރެއްވިއެވެ.