މިނިސްޓްރީ އޮފް ކްލައިމެޓް ޗޭންޖް, އެންވަޔަރަންމަންޓް އެންޑް އެނަރޖީ އަދި ވޭސްޓް މެނޭޖްމަންޓް ކޯޕަރޭޝަން ގުޅިގެން ސަރަހައްދީ ފެންވަރުގައި ޒޯން 2 ގެ ކުނި މެނޭޖްކުރުން ހަރުދަނާކުރުމާއި ގުޅޭ ފޯރަމްއެއް މިއަދު ވަނީ ރ. ދުވާފަރުގައި ފަށަައިފިއެވެ.
ޒޯން 2 ގެ 45 ރަށަކުން އަތޮޅުކައުންސިލްތަކާ ރަށުކައުންސިލްތަކުން 96 ބައިވެރިންނާއެކު 2 ދުވަހުގެ މުއްދަތަށް ދުވާފަރުގައި ކުރިއަށްގެންދާ މި ފޯރަމް ކުރިއަށްދާނީ މިހިނގާ ޖުލައި މަހުގެ 30 އިން 31 ގެ ނިޔަލަށެވެ.
މި ފޯރަމްގެ މައިގަނޑު އެއް ބޭނުމަކީ ވޭސްޓް މެނޭޖްމަން ކޯޕަރޭޝަންގެ ފަރާތުން މިރަށްތަކުގެ ކުނި މެނޭޖްކުރުމުގައި ދިމާވާ ދަތިތައް ފާހަގަކޮށް އެކަމަށް ދާއިމީ ހައްލެއް ހޯދުމަށް މަޝްވަރާކުރުމާއި ސަރަހައްދީ ފެންވަރުގައި ޒޯން 2 ގެ ކުނި މެނޭޖްކުރުމުގެ މަސައްކަތް ރޭވިފައިވާ ގޮތާއި ބެހޭ މައުލޫމާތުން ބައިވެރިންނާއި ހިއްސާކުރުން ހިމެނެއެވެ. މީގެ އިތުރުން މިހާރު ވެމްކޯއާއި އެއްކޮށް ކުނި މެނޭޖްކުރުމުގެ އެއްބަސްވުމުގައި ސޮއި ނުކޮށް ހުރިރަށްރަށް އެފުރުސަތު ފަހިކޮށްދިންނުން ހިމެނެއެވެ.
މިފޯރަމަކީ މިސަރުކާރުން ކުރިއަށްގެންދާ 'މަގޭ ސާފު ރާއްޖެ' ޕްރޮގްރާމްގެ ދަށުން ދިވެހި ދައުލަތުގެ ބަޖެޓުންނާއި ވަރލްޑް ބޭންކުގެ ހިލޭ އެހީގައި ހިންގާ މޯލްޑިވްސް ކްލީން އެންވަޔަރަންމަންޓް ޕްރޮޖެކްޓުން އިސްނަގައިގެން ކުރިއަށްގެންދާ ހަރަކާތެކެވެ.
ރ. ދުވާފަރުގައި ކުރިއަށްދާ މި ފޯރަމް އިންތިޒާމްތައް ހަމަޖެއްސުމުގައި އިސްވެ ހަރަކާތްތެރިވަނީ ރ. ދުވާފަރު ކައުންސިލްގެ ފަރާތުންނެވެ.