ރައީސުލްޖުމްހޫރިއްޔާ ޑރ. މުހައްމަދު މުއިއްޒުވަރުގެ ކޫލު ރައީސަކު މިހާތަނަށް ދެކެވަޑައިނުގަންނަވާ ކަމަށް ވިދާޅުވެ ލޯކަލް ސިޓީސް މިނިސްޓަރު އާދަމް ޝަރީފް އުމަރު، ރައީސް މުއިއްޒަށް ތައުރީފު ކުރައްވައިފި އެވެ.

ރޭ ބޭއްވި ކޮންގްރެސްގެ ހަރުގެ ޖަލްސާގައި ވާހަކަ ދައްކަވަމުން ޕީއެންސީގެ ރިޔާސީ ޓިކެޓް ހޯއްދެވުމަށް މުއިއްޒުއާ ވާދަކުރެއްވި އާދަމް ޝަރީފް ވިދާޅުވި ގޮތުގައި ރައީސް މުއިއްޒާ އެކު އެ ބޭފުޅުން މަސައްކަތް ކުރައްވަނީ ވަރަށް ފަސޭހަ ކަމާ އެކު އެވެ. ރައީސަކީ މަޝްވަރާއަށް އިސްކަން ދެއްވާ ބޭފުޅެއް ކަމަށާ އަމިއްލަ ޒާތުފުޅަށް ނިންމެވޭވަރުގެ ކަންކަން ވެސް ވަޒީރުންގެ މަޖިލީހާއި ޕާޓީގެ ލީޑާޝިޕާ އަދި އާންމު މެންބަރުންނާ ވެސް މަޝްވަރާ ކުރުމަށް ފަހު ނޫނީ ނުނިންމަވާ ކަމަށް އާދަމް ޝަރީފް ވިދާޅުވިއެވެ.

މީގެ އިތުރުން މިނިސްޓަރ ވިދާޅުވީ ރައީސް މުއިއްޒު ފަދަ ދީނަށް ލޯބި ކުރައްވާ ވެރިއަކު މިހާތަނަށް ރާއްޖެ ދެކެފައި ނެތް ކަމަށާއި އަދި ފަލަސްތީނުގެ މައްސަލާގައި އެންމެ ވަރުގަދަ މަސައްކަތްތަކެއް ކުރެއްވީ ރައީސް މުއިއްޒު ކަމަށެވެ.

ޖަލްސާގައި ވާހަކަފުޅު ދައްކަވަމުން އާދަމް ޝަރީފް ވިދާޅުވި ގޮތުގައި ޕީއެންސީގައި އޮތީ އެންމެ މައްސަލައެއް ކަމަށާއި އެއީ ރައީސް މުއިއްޒުގެ ޒައާމަތުގައި އެމަނިކުފާނާ އެކު މަސައްކަތް ކުރަން ބޭނުންވެގެން ތިބި އެންމެނަށް އެ ފުރުސަތު ނެތުމެވެ. އެހެން އެއްވެސް މައްސަލައެއް ނެތް ކަމަށް މިނިސްޓާރ ވިދާޅުވި އެވެ.