ދިވެހި ރާއްޖެގެ ތަޢުލިމީ ފެންވަރު ރަގަޅުކޮށް، ތަޢުލީމިދާއިރާ އިން ފުރުސަތުތައް ފުޅާ ކުރުމުގެ ގޮތުން މަޝްވަރާކުރެއްވުމަށް ސްރީލަންކާގެ ކޮޓަލަވާލާ ޑިފެންސް ޔުނިވަރސިޓީ (ކޭޑީޔޫ) ގެ ވައިސް ޗާންސެލަރ ރިއަރ އެޑްމިރަލް އެޗްޖީޔޫ ދައްމިކާ ކުމާރާ، ވަޒީރު ޑރ. މަރްޔަމް މާރިޔާ ބައްދަލު ކުރައްވައިފިއެވެ.
މޯލްޑިވްސް ޕޮލިޓެކްނިކްގައި ބޭއްވި މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވިފައިވަނީ ތަޢުލީމީ ގޮތުން ކުރިއެރުވުމަށްޓަކައި ކޭޑީޔޫ އިން ވެދެވެން އޮތް އެއްބާރުލުންތަކާއި ގުޅޭގޮތުންނެވެ. އެގޮތުން ދިވެހި އޭ-ލެވެލް ދަރިވަރުންނަށް ކޭޑީޔޫގައި ކިޔެވުމުގެ ފުރުޞަތު ހޯދައިދިނުމާ ގުޅޭގޮތުން މަޝްވަރާކުރެވިފައިވެއެވެ.
އޭގެ އިތުރުން އެހެނިހެން ދާއިރާތަކުން މީހުންބިނާކުރުމުގައި އެ ޔުނިވާސިޓީއިން ވެދެވެން އޮތް އެއްބާރުލުމާއި ގުޅޭގޮތުން ވެސް ވަނީ މަޝްވަރާކުރެވިފައެވެ. ޚާއްޞަކޮށް ޞިއްޙީ، އިންޖިނިއަރިންގ، އޭވިއޭޝަން އަދި މެނޭޖްމަންޓް ދާއިރާތަކުގެ ޕްރޮގްރާމްތަކާ ގުޅޭގޮތުން މަޝްވަރާކޮށްފައިވެއެވެ.
މި ފަދަ މަޝްވާރާތަކުގެ މަޤްޞަދަކީ ދަރިވަރުންގެ ތަޢުލީމީ އަދި ފަންނީ ކުރިއެރުން އިތުރުކުރުމެވެ. އެގޮތުން މި ބައްދަލުވުމުންގައި ތަޢުލީމީ ފެންވަރު މަތިކޮށް، ދަރިވަރުންނަށް ތަޢުލީމީ ފުރުޞަތުތައް ފުޅާކުރުމަށް ކުރެވޭ މަސައްކަތްތަކަށް ވަނީ އަލިއަޅުއްވާލައްވާފައެވެ.
މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން ދިވެހިންނަށް މަތިތައުލީމުގެ ދާއިރާއިން އިތުރު ފުރުސަތުތައް ހޯދަވައިދިނުމަށް، ރާއްޖޭގެ ޔުނިވާސިޓީތަކުގެ އިތުރުން ބޭރުގެ އެކިއެކި ޔުނިވާސިޓީތަކާއި އެކު މަޝްވަރާކުރައްވާ، އެތަންތަނުން ކިޔެވުމުގެ ފުރުސަތުތައް އަންނަނީ ފަހިކޮށްދެމުންނެވެ.
