އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި މޯލްޑިވްސް ޕޮލިޓެކްނިކާއި ގުޅިގެން ނުކުޅެދުންތެރިކަން ހުންނަ ފަރާތްތަކަށް އަމާޒުކޮށްގެން އިލެކްޓްރިކަލް އިންސްޓޯލްމަންޓް އެންޑް މެއިންޓެނަންސް ކޯސް ފަށައިފިއެވެ. މި ކޯހުގައި އަޑު އެހުމުގެ ނުކުޅެދުންތެރިކަން ހުންނަ 17 އަށްވުރެ ގިނަ ފަރާތަކުން ވަނީ ބައިވެރިވެފައެވެ.

މޯލްޑިވްސް ޕޮލިޓެކްނިކްގެ މާލެ ކެމްޕަހުގައި ހިންގާ މި ކޯހަކީ އިލެކްޓްރިކަލް އިންސްޓޯލްމަންޓް އެންޑް މެއިންޓެނަންސްގެ ދާއިރާއިން ޤައުމީ ސެޓްފިކެޓް ލެވެލް 3 ގެ ކޯހެކެވެ. އަދި ކޯސް ފުރިހަމަ ކުރާ އެންމެހައި ފަރާތްތަކަށް ގޭގެއަށް ގޮސް އިލެކްޓްރިކަލް މަސައްކަތްކުރުމުގެ ލައިސެންންސް ވެސް ލިބިގެންދާނެއެވެ. 4 އޮގަސްޓުގައި ފެށިގެންދިޔަ މި ކޯހަކީ 6 މަސްދުވަހުގެ ކޯހެކެވެ.

ޕޮލިޓެކްނިކާއި ގުޅިގެން ފެށި މި ކޯސްތަކަކީ، ނުކުޅެދުންތެރިކަން ހުންނަ ފަރާތްތަކަށް އާމްދަނީ ހޯދޭނެ މަގު ފަހިކުރުމާއެކު، ވަޒީފާގެ މައިދާނުގައި ނުކުޅެދުންތެރިކަން ހުންނަ ފަރާތްތަކަށް ހަމަހަމަ ފުރުޞަތުތައް ހޯދައިދިނުމަށް ބާރުއެޅުމުގެ ގޮތުން އިޖުތިމާއީ އަދި އާއިލީ ތަރައްގީއާއި ބެހޭ ވުޒާރާއިން ކުރަމުން ގެންދާ ގިނަ ގުނަ މަސައްކަތްތަކުގެ ބައެކެވެ.

އެއާއެކު، މިފަދައިން ކުރެވޭ މަސައްކަތްތަކުގެ ތެރެއިން އެއްވެސް މީހަކު ބާކީ ނުވާނެހެން މުޖުތަމައުގައި ހަމަހަމަކަން ގާއިމްކުރުމަށް ވެސް ބާރު އެޅިގެންދާނެ އެވެ.

އިޖުތިމާޢީ އަދި ޢާއިލީ ތަރައްޤީ ބެހޭ ވުޒާރާއިން ވަނީ ޕޮލިޓެކްނިކުން މިފަދަ ކޯސްތަކެއް ނުކުޅެދުންތެރިކަން ހުންނަ ފަރާތްތަކަށް ހިންގާދެއްވާ ކަމަށްޓަކައި، ޕޮލިޓެކްނިކްގެ މަސައްކަތް ފާހަގަކޮށް ޝުކުރުއަދާކޮށްފައެވެ. ވަކިން ޚާއްސަކޮށް މި ކޯސް ނަންގަވައިދިނުމުގައި އެހީތެރިކަން ފޯރުކޮށްދެއްވަމުން ގެންދަވާ ޒޫޝާން ކަމާލުއްދީން އަށް ވަރަށް ޚާއްސަ ޝުކުރެއް އަދާކުރާކަމަށް އެ ވުޒާރާއިން ވަނީ ބުނެފައެވެ.

މި ކޯހުގެ އިތުރުން، ޕޮލިޓެކްނިކްގެ ކޭކް އަޅަން ދަސްކޮށްދިނުމުގެ ކޯހެއްވެސް ވަރަށް އަވަހަށް ފެށުމަށް ހަމަޖެހިފައިވާކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން މަޢުލޫމާތުދެއެވެ.