ކީރިތި ޤުރްއާން ކިޔެވުމާއި ކިޔަވައިދިނުމުގެ ދާއިރާގައި މަސައްކަތްކުރައްވާ ޤާރީންނަށް އަމާޒުކޮށްގެން "ޤާރީންގެ ގުންޒަރު 2024" މި ނަމުގައި ކީރިތި ޤުރްއާނާ ބެހޭ ޤައުމީ މަރުކަޒުން ބައްދަލުވުމެއް ބާއްވައިފިއެވެ.
މިއީ ރާއްޖޭގެ ޤާރީން ބައްދަލުވެ، ޚިޔާލު ބަދަލުކޮށް، މަޝްވަރާ ކޮށްލުމަށާއި އެކުވެރިކަން އާލާކޮށް، ގުޅުން ބަދަހިކުރުމުގެ ވަގުތުކޮޅެއް ފަހިކޮށްދިނުމުގެ މަޤްޞަދުގައި، ސިލްސިލާކޮށް ބާއްާން ނިންމަވައިފައިވާ ބައްދަލުވުމެކެވެ. މި ބައްދަލުވުމުގައި ކީރިތި ޤުރްއާން ކިޔަވައިދިނުމުގެ ދާއިރާގައި މަސައްކަތް ކުރައްވަމުންގެންދަވާ ޤާރީންގެ ތެރެއިން 36 ބޭފުޅުން ބައިވެރިވެވަޑައިގަތެވެ.
7 އޮގަސްޓު 2024 ވީ ބުދަ ދުވަހުގެ ރޭ އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި މި ބައްދަލުވުން ޝަރަފުވެރިކޮށް ދެއްވީ މިނިސްޓަރ އޮފް ސްޓޭޓް ފޮރ އިސްލާމިކް އެފެއާޒް އަލްއުސްތާޛު ޢަބްދުލްޢަޒީޒް ޖަމާލް އަބޫބަކުރެވެ.
މި ގުންޒަރުގައި ކީރިތި ޤުރްއާނާ ބެހޭ ޤައުމީ މަރުކަޒުން، ކީރިތި ޤުރްއާން ކިޔަވައިދިނުމުގެ ދާއިރާއާ ގުޅުން ހުރި ކަރުދާހެއް ހުށަހަޅައި، ޤާރީންގެ މެދުގައި އެ ކަރުދާހާމެދު ފުޅާ ދާއިރާއެއްގައި މަޝްވަރާކުރެވުނެވެ. އަދި ޤުރްއާނުގެ ދާއިރާގައި ރާއްޖޭގެ ޤާރީންނަށް މިހާރު ދިމާވާ ގޮންޖެހުންތަކާމެދު ޤާރީންގެ މެދުގައި ޚިޔާލު ބަދަލުކުރެވުނެވެ.
