މި ސަރުކާރު ހަވާލުވިއިރު މަހުގެ އަގު ހުރީ އަމިއްލަ ކުންފުނިތަކަށް މަސް ނުގަނެވޭ ވަރަށް ބޮޑުކޮށްފައި ކަމަށް އެސްއެސްޓީވީގެ ބާރު ހަތަރެއް ޕްރޮގްރާމުގައި ވާހަކަދައްކަވަމުން ޑިރެކްޓަރ އަޙްމަދު ޝިފާޒް ވިދާޅުވެއްޖެއެވެ.

ޝިފާޒު ވިދާޅުވީ އޭރު މަހުގެ އަގު ހުރީ އަމިއްލަ ކުންފުނިތަކުން މަސްގަނެގެން އެކަށީގެންވާ ގޮތެއްގައި ވިޔަފާރި ނުކުރެވޭ އަގެއްގައި ކަމަށާއި އެކަމުގެ ސަބަބުން އަމިއްލަ ވިޔާފާރިތަކަށް ބޮޑެތި ގެއްލުންވި ކަމަށެވެ.

ޝިފާޒް ވިދާޅުވި ގޮތުގައި، ސިޔާސީ ސަބަބުތަކަށްޓަކައި އިންތިޚާބު ތެރޭގައި މަހުގެ އަގު ބޮޑުކުރި ނަމަވެސް، އެއީ އަމިއްލަ ކުންފުނިތަކަށް ދެކޮޅު ޖެއްސޭނެ އަގެއް ނޫނެވެ. އޭރު ސަރުކާރު ކުންފުނި މިފްކޯއިން މަސް ގަންނަމުން ދިޔައީ ދައުލަތުން ސަބްސިޑީގެ ގޮތުގައި ގިނަ އަދަދެއްގެ ފައިސާ ދީގެން ކަމަށާއި، މަހުގެ އަގަށް ގެނައި ކުއްލި ބަދަލުގެ ސަބަބުން އަމިއްލަ ކުންފުނިތަކަށް ވަރަށް ބޮޑު ގެއްލުން ވެގެން ދިޔަ ކަމަށް އޭނާ ފާހަގަކުރެއްވިއެވެ.

އަދި މާކެޓް ރޭޓަށް މަހުގެ އަގު ދޫކޮށްލުމަށް މި ސަރުކާރުން ނިންމުމަކީ ވަރަށް މުހިންމު ކަމެއް ކަމަށް ޝިފާޒް ވިދާޅުވިއެވެ. ބޭރު ބާޒާރުގެ އަގަށް މަހުގެ އަގު ދޫކޮށް މިފްކޯއާއި އެހެން ކުންފުނިތަކަށް އަގު ކަނޑައެޅުމުގެ ބާރު ދޫކޮށްލުމުން ޕްރޮސެސް ކުރާ ފަރާތްތަކުން މަސްވެރި ސިނާއަތަށް އިންވެސްޓް ކުރުމަށް ޝައުގުވެރިވެ މި ދާއިރާއަށް އިތުރު ކުރިއެރުން ލިބިގެން ދާނެ ކަމަށް އޭނާ ވިދާޅުވިއެވެ.