ބޭ އޮފް ބޭންގާލް އިންޓަރ-ގަވަރމަންޓަލް އޯގަނައިޒޭޝަން (ބީ.އޯ.ބީ.ޕީ-އައި.ޖީ.އޯ) އާއި އިންޓަނޭޝަނަލް ޔޫނިއަން ފޯ ދަ ކޮންޒަވޭޝަން އޮފް ނޭޗަރ (އައި.ޔޫ.ސީ.އެން) އިން މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާ އަދި މޫސުމީ ބަދަލުތަކާއި، ތިމާވެށްޓާއި ހަކަތައާ ބެހޭ ވުޒާރާ އާ ގުޅިގެން ކުރިއަށް ގެންދާ ބޭ އޮފް ބެންގާލް ލާޖް މެރިން އީކޯސިސްޓަމް (ބީ.އޯ.ބީ.އެލްއެމް.އީ) ޕްރޮޖެކްޓްގެ ދެވަނަ ފިޔަވަހި ފެށުމުގެ ގޮތުން އޯގަސްޓު 12 އިން 13 އަށް ޅ. ނައިފަރުގައި މަސައްކަތު ބައްދަލުވުމެއް ބާއްވައިފިއެވެ.

މި ބައްދަލުވުން އިފްތިތާޙް ކުރައްވައިފައިވަނީ މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަލްފާޟިލް އަޙްމަދު ޝިޔާމެވެ. އަދި މި ހުޅުވުމުގެ ރަސްމިއްޔާތުގައި ނައިފަރު ދާއިރާގެ ޢިއްޒަތްތެރި މެންބަރު ޔާސީން ޢަބްދުﷲ އާއި ތިމާވެށްޓާ ބެހޭ ވުޒާރާގެ ސްޓޭޓް މިނިސްޓަރ އަލްފާޟިލް ނާޒިމް އިބްރާހިމް ގެ އިތުރުން ދަޢުލަތުގެ އެހެނިހެން އިދާރާތަކުގެ އިސްވެރިންނާއި ނައިފަރުގެ މަސްވެރިންނާއި، ފަތުރުވެރިކަމުގެ ދާއިރާގައި ޙަރަކާތްތެރިވާ ފަރާތްތަކާއި ކަމާ ގުޅޭ ޖަމްޢިއްޔާ ޖަމުޢިއްޔާތަކުގެ ފަރާތުން ބައިވެރިވެވަޑައިގެންފައިވެއެވެ.

ބޭ އޮފް ބެންގާލް ލާޖް މެރިން އީކޯސިސްޓަމް (ބީ.އޯ.ބީ.އެލްއެމް.އީ) ޕްރޮޖެކްޓްގެ މައިގަނޑު މަގުސަދަކީ ބޭ އޮފް ބެންގާލް ސަރަޙައްދުގެ އައްސޭރިފަށުގެ ޤައުމުތަކުގެ ލާބައާއި މަންފާއަށްޓަކައި އެ ސަރަޙައްދުގެ ކަނޑުގެ ވަސީލަތްތަކާއި ކަނޑުގެ މާޙައުލާއި އެ މާޙައުލުގައި އުޅޭ ދިރުންތައް އަދި އެ ސަރަޙައްދުގައި ކުރެވޭ މަސްވެރިކަން ދެމެހެއްޓެނިވި ގޮތެއްގައި ބަލަހައްޓައި، ރާވައި، ހިންގުމެވެ.

މިގޮތުން، މި ޕްރޮޖެކްޓްގެ ޙަރަކާތްތައް ދިވެހިރާއްޖޭގެ އިތުރުން އިންޑިއާ، ސްރީކަންކާ، އިންޑޮނޭޝިއާ، މެލޭޝިއާ، މިޔަންމާ އަދި ތައިލލޭންޑުގައި ތަންފީޒުކުރެވެއެވެ. ރާއްޖޭގައި ޕްރޮޖެކްޓްގެ ހަރަކާތްތައް އަމާޒުކުރެވިފައިވަނީ ޅ. އަތޮޅާއި ހުވަދޫ އަތޮޅަށެވެ. ޕްރޮޖެކްޓްގެ ފަސް އަހަރުގެ މުއްދަތުގެ ތެރޭގައި މި ދެ އަތޮޅުގައި ކުރެވޭ ފަރުމަސްވެރިކަމާއި އެންވެރިކަން ދެމެހެއްޓެނިވި ގޮތެއްގައި ކުރުމަށާއި، މި ދެ އަތޮޅުގައި ޙިމާޔަތްކޮށްފައިވާ ސަރަޙައްދުތައް މެނޭޖްކުރުން ހަރުދަނާކުރުމަށް މަސްލަހަތުވެރިންނާ އެކު މަސައްކަތްތަކެއް ކުރުމަށް ނައިފަރުގައި ބޭއްވުނު މަސައްކަތު ބައްދަލުވުމުގައި ވަނީ މަޝްވަރާކުރެވިފައެވެ.