މާލެ ސަރަހައްދަށް ކުރިމަތިވެފައިވާ ޓްރެފިކް އަދި ޕާކިންގ މައްސަލަތަކަށް އަވަސް ހައްލެއް ހޯދުމުގެ މަޤްޞަދުގައި މިއަދު މުހިންމު މަޝްވަރާ ބައްދަލުވުމެއް ބާއްވައިފިއެވެ.
މި ބައްދަލުވުން އިންތިޒާމުކޮށް ކުރިއަށް ގެންދިޔައީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންއިންނެވެ.
މި ބައްދަލުވުމުގައި ވެހިކަލް ކޮންޖެސްޝަން މައްސަލަ ހައްލުކުރުމަށް ކުރެވެންހުރި މަސައްކަތްތަކާއި ދިމާވާ ގޮންޖެހުންތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ. ބައްދަލުވުމުގައި ބައިވެރިވެވަޑައިގެންނެވި ބޭފުޅުންގެ ތެރޭގައި މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުޙައްމަދު އަމީން، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ ޢަލީ އިޙްސާން، މާލެ ސިޓީގެ މޭޔަރ އާދަމް އާޒިމް، ޕޮލިސް ކޮމިޝަނަރ އަލީ ޝުޖާއު، އަދި ހުޅުމާލެ ޑިވެލޮޕްމަންޓް ކޯޕަރޭޝަންގެ މެނޭޖިންގ ޑިރެކްޓަރ އިބްރާހިމް ފަޒުލް ރަޝީދު ހިމެނިވަޑައިގަންނަވައެވެ.
މި ބައްދަލުވުމަކީ ގްރޭޓަރ މާލެ ސަރަހައްދުގައި ދުވަހެއް ދުވަހަކަށް އިތުރުވަމުންދާ ޓްރެފިކް އަދި ޕާކިންގ މައްސަލަތަކަށް އަވަސް ހައްލެއް ހޯދުމަށްޓަކައި ކަމާގުޅުންހުރި މުއައްސަސާތަކުގެ މެދުގައި ބޭއްވުނު ފުރަތަމަ ބައްދަލުވުމެވެ. މި ބައްދަލުވުމުގައި މަޝްވަރާކުރެވުނު ކަންތައްތަކުގެ އަލީގައި ކުރިއަށް އޮތް ތަނުގައި އަވަސް ފިޔަވަޅުތަކެއް އެޅިގެންދާއެވެ.
