މާލޭ މަގުތަކުގައި ރަޖިސްޓްރީނުކޮށް ބަހައްޓާފައިވާ އުޅަނދުތަކާއި އެހެން ޒޯންތަކަށް ރަޖިސްޓްރީކޮށްފައިވާ އުޅަނދުތައް ރަޖިސްޓްރީ ޤާނޫނީ އިމުގެތެރެއަށް ވެއްދުމަށް މުއްދަތެއް ދެވިގެން ދާނެ ކަމަށް މިނިސްޓަރ މުޙައްމަދު އަމީން ވިދާޅުވެއްޖެއެވެ.

މިނިސްޓަރ އަމީން ވިދާޅުވިގޮތުގައި، މިފަދަ އުޅަނދުތައް ބޭއްވުމަށް ކަނޑައެޅޭ ސަރަޙައްދުން އުޅަނދުގެ ވެރިފަރާތްތަކުން 40 ދުވަހުގެ ތެރޭގައި އެ އުޅަނދުތައް ގެންދަންޖެހޭނެއެވެ. އަދި ރަޖިސްޓްރީނުކޮށް ހުރި އުޅަނދުތައް ޤާނޫނީ އިމުގެ ތެރެއަށް ފެއްތުމަށް 6 މަސްދުވަހުގެ މުއްދަތެއް ދެވޭނެކަމަށްވެސް މިނިސްޓަރ އަމީން ވިދާޅުވިއެވެ.

މި 6 މަސްދުވަހުގެ ތެރޭގައި އުޅަނދުގެ ވެރިފަރާތްތަކަށް އަމިއްލަ ގަރާޖަކަށް ބަދަލުކުރުމާއި، މާލެއިން ބޭރަށް ގެންދިއުމާއި، ޒޯން ބަދަލުކުރުމާއި އަދި ޤާނޫނީ އިމުގެ ތެރެއިން ރަޖިސްޓްރީކުރުމުގެ ފުރުސަތު ލިބިގެންދާނެކަމަށް މިނިސްޓަރ އަމީން ވިދާޅުވިއެވެ.

މިއީ މާލޭގެ މަގުތަކުގައި ޕާކުކޮށްފައި ހުންނަ އުޅަނދުތަކުގެ މައްސަލަ ޙައްލުކުރުމަށް ސަރުކާރުން އަޅަމުންދާ ފިޔަވަޅުތަކުގެ ތެރެއިން އެޅޭ އިތުރު ފިޔަވަޅެކެވެ. މި ފިޔަވަޅުތަކުގެ ސަބަބުން މާލޭގެ މަގުތަކުގައި ދިމާވެފައިވާ ޕާކިންގގެ ދަތިކަން ކޮންމެވެސް ވަރަކަށް ލުއިވެގެންދާނެކަމަށް ވެސް މިނިސްޓަރ އަމީން ވިދާޅުވިއެވެ.