އައްޑޫ ސިޓީގައި މި ބޭއްވުނު ސަމިޓަކީ ވަރަށް ކާމިޔާވު އަދި އެދެވޭ ރަނގަޅު ނަތީޖާތަކެއް ނެރެވޭ ކަހަލަ މަޝްވަރާތަކެއް ކުރެވުނު ސަމިޓެއް ކަމަށް ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ ފުރިހަމަ ސިޓީ ބްރޭޑެއް ތަރައްްްޤީކޮށް ޕްރިމިއަރ ބްރޭންޑެއްގެ ގޮތުގައި އައްޑޫ ޕްރޮމޯޓުކުރުމަށް "ޑެސްޓިނޭޝަން އައްޑޫ 2024 ސަމިޓް" ނިންމުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

މި ރަސްމިއްމިއްޔާތުގައި އެ މަނިކުފާނު ދެއްކެވި ވާހަކަފުޅުގައި އައްޑޫ ސިޓީ ކައުންސިލުން ކުރައްވަމުން ގެންދަވައި މަސައްކަތްތަކަށް ވަރަށް ބޮޑަށް ތަޢުރީފުކުރައްވާފައި ވެއެވެ. އެ ގޮތުން އެ މަނިކުފާނު ވިދާޅުވީ އައްޑޫ ސިޓީއާއެކީގައި މަސައްކަތްކުރަން ވަރަށް ފަސޭހަ ކަމަށާ، އައްޑޫ ސިޓީގެ ފަރާތުން ގެންގުޅުއްވާ ފަހި ވިސްނުން އެއީ ކަންކަން ކުރުމުގައި ވަރަށް ބޮޑު ހިތްވަރެއް ލިބިގެންދާ ކަމެއް ކަމަށެވެ. އަދި ވަޒީރު ވިދާޅުވީ ސަރުކާރުގެ ވުޒާރާތަކާ، އެކި ކުންފުނިތަކާ އަދި ޓުއަރިޒަމުގެ ސިނާއަތާ ގުޅުން ހުރި އެކިފަރާތްތަކުން ދޭންޖެހޭ އެއްބާރުލުންތަކެއް ނުވަތަ ގުޅިގެން މަސައްކަތްކުރަންޖެހޭ ކަންތައްތަކެއް ނުވަތަ ދާއިރާތަކެއް ހުރިކަން މި ސަމިޓުން އެނގިގެން ދިޔަ ކަމަށެވެ.

"މިއަދު މި ސަމިޓުގައި ކުރެވުނު މަޝްވަރާތަކުގެ އަލީގައި އަޅުގަނޑު ތިޔަބޭފުޅުންނަށް ހަމަ ޔަޤީންކަން އަރުވަން ބޭނުން ސަރުކާރުގެ ތެރެއިން ކުރަންޖެހޭ ހަމަ ކޮންމެ ކަމެއްކުރުމުގައި ޚާއްޞަކޮށް ސިޓީ ކައުންސިލުގެ ފަރާތުން މި ކަމަށް ޓަކައި ކުރަންޖެހޭ ކޮންމެ މަޝްވަރާއެއްގައި އަޅުގަނޑު އިރާދަ ކުރެއްވިޔާ ކައުންސިލުން އެދިވަޑައިގަންނަވައި ކޮންމެ ފަހަރަކު ކޮންމެ ޙާލަތެއްގައި ވިލަރެސްކުރުމުގެ މަސައްކަތްކޮށްދޭނެ ވާހަކަ ޔަޤީންކަމާއެކު ތިޔަ ބޭފުޅުންނަށް އަރުވަން" ވަޒީރު ވިދާޅުވިއެވެ.

މި ރަސްމިއްޔާތިގައި އެ މަނިކުފާނު ދެއްކެވި ވާހަކަފުޅުގައި ސިޓީސް މިނިސްޓްރީގެ އަމާޒަކަށް ވާނީ ރައްޔިތުން ނުވަތަ ކައުންސިލުތަކުން އިސްވެ ފައްޓާ ކޮންމެ ކަމެއްގައި ސަރުކާރާ، ރައްޔިތުންނާ އަދި ކައުންސިލުތަކާ ގުޅުވާލަދިނުމުގެ މަސައްކަތްތައްކުރުން ކަމަށް ވިދާޅުވިއެވެ. އަދި އައްޑޫގައި ޓުއަރިޒަމް ސިނާއަތު ފުޅާކުރުމަށް ސަރުކާރުގެ ތެރޭންކުރަން ޖެހޭ ކޮންމެ ކަމެއް އަދި ޚާއްޞަކޮށް ސަމިޓުގައި މަޝްވަރާކުރެވުނު ކަންތައްތަކުގެ ތެރޭގައި ހިމެނޭ ދަތުރުފަތުރުކުރުމުގެ ނިޒާމާ، އަލަށް ފައްޓަވައި ވިޔަފާރިވެރިންނަށް ޓެކްސްގެ ތެރޭން ހުރި ގޮންޖެހުންތައް ޙައްލުކޮށްދިނުމަށް އެ ބޭފުޅުންގެ ޙައްޤުގައި ސަރުކާރާ ހަމައަށް އެ ވާހަކަތައް ގެންގޮސްދެއް ވާނެ ކަމަށް ވިދާޅުވިއެވެ.

"ޑެސްޓިނޭޝަން އައްޑޫ 2024 ސަމިޓް" ނިންމަވައި ލެއްވުމަށް ފަހު މިރޭގެ ވަގުތެއްގައި ވަޒީރު މާލެ ވަޑައިގަންނަވައި ގޮތަށް ވަނީ ހަމަޖެހިފައެވެ. މި ސަމިޓުގައި ވަޒީރުގެ އަރިހުގައި އައްޑޫ ސިޓީ ހިމެނޭ ކުލަސްޓަރ ބަލަހައްޓަވައި ސްޓޭޓް މިނިސްޓަރ މޫސާ ފަތުޙީ އާދަމް ވެސް ބައިވެރިވެ ވަޑައިގެންނެވިއެވެ.