އައްޑޫ ސިޓީ ހުޅުމީދޫ އާއި ހިތަދޫ ގުޅާލުމަށް ހަމަޖެހިފައިވާ ބްރިޖު މަޝްރުއޫ ނުހުއްޓޭ ކަމަށާއި، މަސައްކަތް ކުރަމުން ދަނީ މަޝްރުއޫއަށް ބޭނުންވާ ފައިސާ ހަމަޖެއްސުމަށް ކަމަށް އިންފްރާސްޓްރަކްޗާ މިނިސްޓަރު އަބްދުﷲ މުއްތަލިބު މިއަދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ އެޖެންޑާގެ ދަށުން ވާހަކަދައްކަވަމުން މިނިސްޓަރު ވިދާޅުވީ އައްޑޫ ބްރިޖް މަޝްރުއޫއަކީ މި ސަރުކާރުން އެންމެ ބޮޑު އަހައްމިއްޔަތުކަމެއް ދޭ އެއް މަޝްރުއޫ ކަމަށެވެ. މި މަޝްރުއޫ ކުރިއަށް ގެންދިއުމަށް ބަޔަކާ އެކު ސޮއިކުރެވި، މަސައްކަތްތަކެއް ކުރެވެމުން ދާކަމަށެވެ.

މިނިސްޓަރު ވިދާޅުވީ ފައިސާ ހަމަ ނުޖެހެނިސް ކޮންޓްރެކްޓެއްގައި ސޮއި ނުކުރާނެ ކަމަށާއި، މިހާރު އޮތް އެއްބަސްވުމުގެ ދަށުން ފައިސާ ހަމަ ނުޖެއްސިއްޖެ ނަމަ އަނެއްކާވެސް އިތުރު ކުންފުންޏަކާ އެކު ކުރިއަށް ދާނެ ކަމަށެވެ. މި މަޝްރުއޫ ހަވާލުކޮށްފައި ވަނީ މިސްރު ސަރުކާރު ކުންފުންޏެއްކަމަށްވާ "ދަ އަރަބް ކޮންޓްރެކްޓާސް"އާ އެވެ.

އެ ކުންފުނިން ހުށަހަޅާފައި ވަނީ، މި މަޝްރުއޫގެ ސާވޭތައް ހިލޭ ކުރިއަށް ގެންދިއުމަށެވެ.