'ހޯޕް އައިލެންޑް' ވެގެންދާނީ ރިހެބިލިޓޭޝަނާއި ޕްރިވެންޝަންގެ އެންމެ ބޮޑު މަސައްކަތް ހިންގާނެ ސެންޓަރަށް ކަމަށް ދާޚިލީ ސަލާމާތާއި ފަންނިއްޔާތާއިބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

8 ވަނަ ޖުވެނައިލް ޖަސްޓިސް ތަމްރީނު ޕްރޮގްރާމް ނިންމުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ ހޯޕް އައިލެންޑް ޤާއިމް ކުރުމުގެ މަސައްކަތް މިވަގުތު ސަރުކާރުން ވަރަށް ބޮޑު އިސްކަމެއް ދީގެން ކުރަމުންދާ ކަމަށާއި މިރަށުގެ މަސައްކަތްނިމި މި ރަށަކީ ރިހެބިލިޓޭޝަނާއި ޕްރިވެންޝަންގެ އެންމެ ބޮޑު މަސައްކަތް ހިނގަމުންދާނެ ސެންޓަރަކަށް ވެގެންދާނެ ކަމަށެވެ.

މިހާރު އަމަލުކުރަމުންދާ ކުޑަކުދިންގެ އަދުލުގެ ނިޒާމަކީ އެންމެ ފުރިހަމަ ނިޒާމެއް ނޫންކަން ފާހަގަކުރައްވާ މިނިސްޓަރ ވަނީ ކަންކަން އިސްލާހުކުރުމަށް ތަފާތު ނިޒާމުތައް ބަލައިގަނެ އަމަލުކުރަން ފެށިނަމަވެސް އޭގައި ރަނގަޅުކުރަންޖެހިފައި ހުންނަ ކުދިކުދި ކަންކަން ހޯދައި އޭގެ ބޭނުން ނަހަމަ ގޮތުގައިހިފާ މީހުން އުޅޭ ކަމަށް ވިދާޅުވެފައެވެ.

އެހެންކަމުން އެކަންކަމަށް ސަމާލުވެ، ނިޒާމުގެ ރައްކާތެރިކަން ކަށަވަރުކުރަން މަސައްކަތް ކުރުމުގެ މުހިންމުކަން ވަޒީރު ވަނީ ފާހަގަކުރައްވާފައެވެ.

ޤާނޫނެއް ލިބުނީ މީގެ ފަސްވަރަކަށް އަހަރު ކުރިން ކަމަށާއި އެހެންނަމަވެސް އޭގެ ކުރިންވެސް ހޯމް މިނިސްޓްރީގެ ތާރީޚަށް ބަލާއިރު ކޮންމެވެސް ސިފައެއްގައި މި މަސައްކަތް ކުރާ ޑިޕާޓްމަންޓެއް ނުވަތަ ސެކްޝަނެއް އޮތްކަން މިނިސްޓަރ ފާހަގަކުރެއްވިއެވެ.

އެހެންނަމަވެސް ޤަބޫލުކުރަން ޖެހޭ ހަޤީޤަތަކީ މިމައްސަލަ ދިޔައީ ޤައުމުގެ ތެރޭގައި ބޮޑުވަމުން ކަމަށާއި ކުށަށް އަރައިގަންނަ ކުޑަކުދިން ދަނީ އިތުރުވަމުންކަން މިނިސްޓަރުގެ ވާހަކައިގައި ފާހަގަކުރެއްވިއެވެ.

ވަޒީރު ވިދާޅުވީ މިފަދަ ތަނެއް ގާއިމް ކުރުމުގެ މަގްސަދަކީ ކުދިން ޖަލަކަށް ލައިގެން އަދަބުދިނުން ނޫންކަމަށާއި އޭގެ ބަދަލުގައި ޤާނޫނުގެ ތެރެއިން ކުދިންނަށް ބޭނުންވާ ތަޢުލީމާއި އެހެނިހެން ޕްރޮގްރާމުތައް ފުރިހަމަކުރާ ޢަޚުލާގު ރަނގަޅު ދަރިންތަކެއް މުޖުތަމަޢަށް ނެރުމަށް އިސްކަންދެއްވާ ކަމަށެވެ.

ރާއްޖޭގައި ކުށަށް ޒިންމާވާ އުމުރު 12 އަހަރަށް ދަށް ކުރަނީވެސް ކުދިންނަށް ވީހާ އަވަހަށް ނިޒާމުގެ ތެރެއިން ޕްރޮގްރާމުތައް ހިންގައި އެކުދިންނަށް ބޭނުންވާ އެހީތެރިކަން ފޯރުކޮށްދިނުމަށް ކަމަށް ވަޒީރު ވިދާޅުވިއެވެ. ވަޒީރު އިހުސާން ވިދާޅުވީ މިހާރު ރާއްޖޭގެ ކުށުގެ ވެއްޓަށް ބަލާއިރު ކުށަށް އަރައިގަންނަ 12 އަހަރާއި 15 އަހަރާއި ދެމެދުގެ ކުދިން ގިނަ ވަމުންދާކަމީ ފެންނަން ހުރި ހަޤީޤަތެއް ކަމަށެވެ. އެހެން ކަމުން ނިޒާމުގެ ތެރެއިން އަވަސް ހައްލުތައް ގެނައުމަކީ މުހިއްމުކަމެއް ކަމަށް ވަޒީރު ވިދާޅުވިއެވެ.

ކުށަށް އަރައިގަންނަ ކުޑަކުދިން ކުށުގެ މާޙައުލުން ދުރުކޮށް އެކުދިން ރަނގަޅު މަގަށް ގެނައުމަށް ރީހެބިލިޓޭޝަން ފެސިލިޓީއެއް ޤާއިމްކުރުމަށް ނިންމާފައިވާކަން ވަޒީރު ހާމަކުރައްވާފައިވަނީ މޭ މަހުގެ 6ވަނަ ދުވަހުއެވެ.