މޯލްޑިވްސް ޕޮލިޓެކްނިކުން ށ. ގޮއިދޫ ކައުންސިލް އާއި ގުޅިގެން އެރަށުގައި ކުރިޔަށް ގެންދެވިދާނެ ތަމްރީން ޕްރޮގްރާމްތަކާއި ގުޅޭގޮތުން މަޝްވަރާކޮށްފިއެވެ.

އޮގަސްޓް 2024 ވީ ހޯމަ ދުވަހު ޕޮލިޓެކްނިކްގައި ބޭއްވުނު މި ބައްދަލުވުމުގައި، ޕޮލިޓެކްނިކްގެ ސީއީއޯ ޛޫޝާން ކަމާލުއްދީންގެ އިތުރުން އެ އިދާރާގެ ބައެއް އިސްބޭފުޅުން ވަނީ ބައިވެރިވެވަޑައިގަންނަވާފައެވެ. އަދި ށ.ގޮއިދޫ ކައުންސިލްގެ ބައެއް އިސްބޭފުޅުން ވެސް މި ބައްދަލުވުމުގައި ބައިވެރިވެވަޑައިގަންނަވާފައިވެއެވެ.

މި ބައްދަލުވުމުގައި، ޕޮލިޓެކްނިކްގެ ތަމްރީނު ޕްރޮގްރާމްތަށް ށ.ގޮއިދޫގައި ކުރިއަށް ގެންދިޔުމަށް ކައުންސިލްގެ ފަރާތުން ދެވެންހުރި އެހީތެރިކަމާއި ގުޅޭ މައުލޫމާތު ޕޮލިޓެކްނިކްގެ ސީއީއޯ ޛޫޝާން ކަމާލުއްދީން އަށް، ގޮއިދޫ ކައުންސިލުން ވަނީ ހިއްސާކޮށްފައެވެ. އޭގެ އިތުރުން އެ ރަށުގެ ސްކޫލްގެ ދަރިވަރުންނަށް ޚާއްސަކޮށް، ކުރިޔަށް ގެންދެވިދާނެ ޕޮރިގްރާމްތަކާއި ގުޅޭގޮތުންވެސް ވަނީ މަޝްވަރާކުރައްވާފައެވެ.

މި ބައްދަލުވުމަކީ ވަރަށް ކާމިޔާބު އުންމީދުން ފުރިގެންވީ ބައްދަލުވުމެއްކަން، ދެފަރާތުންވެސް ވަނީ ފާހަގަކޮށްފައެވެ.

ސެޓްފިކެޓް 1 ކުން ފެށިގެން 5 ކާއި ހަމައަށް ތަފާތު އެކި ތަމްރީނު ޕްރޮގްރާމްތަށް ޕޮލިޓެކްނިކްގައި ކުރިއަށް ގެންދެއެވެ. އެގޮތުން، ބޭކިން އެންޑް ޕޭސްޓްރީ، ޕޮޓޯގްރަފީ، ސިވިލް އިންޖީނިއަރިން، އިލެކްޓރިކް އިންޖީނިއަރިން، ޕްރޮގްރާމިން، ވެލްޑިންގ އެންޑް މެޓަލްފެބްރިކޭޝަން، ޓޭލަރިން އެންޑް ފެޝަންޑިޒައިނިންގ ފަދަ އެތަށް ދާއިރާތަކަކުން ތަމްރީނު ހާޞިލުކުރުމުގެ ފުރުސަތު ޕޮލިޓެކްނިކުން ވަނީ ހުޅުވާލައިފައެވެ.

މޯލްޑިވްސް ޕޮލިޓެކްނިކްގެ މި ކޯސްތައް އެ އިދާރާ އާއި ގުޅިގެން އަތޮޅުތަކުގައިވެސް ކުރިޔަށް ގެންދިއުމުގެ ފުރުސަތުވެސް ވަނީ ހުޅުވާލާފައެވެ. އެގޮތުން މިހާރުވެސް ރާއްޖޭގެ އެކި ސަރަހައްދުތަކުން ރަށްރަށުގެ ކައުންސިލާއި ޖަމިއްޔާ ޖަމާޔަތްތަކާއި ގުޅިގެން ، ޕޮލިޓެކްނިކުން އަންނަނީ ރާއްޖެއަށް ބޭނުންވާ މަސައްކަތްތެރިކަމުގެ ދާއިރާތަކުން މީހުން ބިނާކުރުމުގެ މަސައްކަތް ކުރަމުންނެވެ.