ލޭނު މަސްވެރިކަމުގެ ޑްރާފްޓް ގަވާއިދުގައި ބަޔާންކޮށްފައިވާ ލައިސަންސް ލިބިގެން މަސްވެރިކަންކުރާ އުޅަނދުފަހަރުން، މަސް ރިޕޯޓު ނުވަތަ ލޮގް ފޮތުގެ މަޢުލޫމާތު މިނިސްޓްރީގެ ވެބްސައިޓުގައި ޝާއިޢުކޮށްފައިވާ [މަސްވެރިކަމާބެހޭ މަޢުލޫމާތު ރިކޯޑުކުރުމާއި ރިޕޯޓްކުރުމާބެހޭ އުސޫލު] ގައި ބަޔާންކޮށްފައިވާ ގޮތުގެ މަތިން ރިކޯޑުކޮށް މިނިސްޓްރީއަށް ފޮނުވަންޖެހޭނެ ކަމަށް އެ މިނިސްޓްރީން ބުނެފިއެވެ.

އެ ގަވާއިދުގެ ދަށުން ލައިސަންސް ލިބިފައިވާ އުޅަނދުފަހަރު މަސްދަތުރަކަށް ފުރުމުގެ 48 (ސާޅީސްއަށެއް) ގަޑިއިރު ކުރިން، މިނިސްޓްރީގެ ވެބްސައިޓްގައި ޝާއިޢުކޮށްފައިވާ "ޑިޕާރޗަރ ކްލިއަރެންސް ފޯމް ފޯ ލޯންގްލައިން ފިޝިން ވެސެލްސް" ފުރުމަށްފަހު މިނިސްޓްރީއަށް ހުށަހަޅަންވާނެއެވެ. އަދި އެ އުޅަނދު މަސްވެރިކަމަށް ފުރަންވާނީ މިނިސްޓްރީން ދޫކުރާ "ޑިޕާރޗަރ ކްލިއަރަންސް" ލިބުމަށްފަހުގައެވެ.

ލޭނު އަޅާ އުޅަނގައި ހަރުކުރާ ވެސަލް މޮނިޓަރިންގ ސިސސްޓަމް (ވީ.އެމް.އެސް) އާ ގުޅޭ ކަންކަން

(ހ) މިގަވާއިދުގެ ދަށުން އެހެން ގޮތަކަށް ކަނޑަނާޅާހާ ހިނދަކު، ލޭނު މަސްވެރިކަން ކުރުމަށް ލައިސަންސްއަށް އެދޭ ކޮންމެ އުޅަނދެއްގައި މިނިސްޓްރީން ކަނޑައަޅާ މިންގަނޑަށް ފެތޭ [ވެސަލް މޮނިޓަރިންގ ސިސްޓަމް] އެއް ޤާއިމުކޮށްފައި ހުންނަންވާނެއެވެ.

(ށ) މިމާއްދާގެ (ހ) ގެ ދަށުން އުޅަނދުގައި ހަރުކޮށްފައިވާ [ވެސަލް މޮނިޓަރިންގ ސިސްޓަމް] ހުންނަންވާނީ، އަބަދުވެސް ހުޅުވާފަ ('އޮން' ކޮށްފަ) އެވެ.

(ނ) މިނިސްޓްރީއަށް ލިޔުމުން އަންގައި ހުއްދަ ލިބިގެންމެނުވީ ވެސަލް މޮނިޓަރިންގ ސިސްޓަމް ނިއްވާލައިގެން ނުވާނެއެވެ.

(ރ) އުޅަނދު މަސްވެރި ދަތުރަށް ފުރުމުގެ ކުރިން، އެ އުޅަނދުގެ ވީ.އެމް.އެސް ފުރިހަމައަށް މަސައްކަތްކުރާކަން އުޅަނދުގެ މާސްޓަރ އަދި އޮޕަރޭޓަރު ޔަޤީންކުރަންވާނެއެވެ.

(ބ) މަސްވެރިކަން ކުރުމަށް ލައިސަންސް ދޫކޮށްފައިވާ އުޅަނދެއްގައި ހަރުކޮށްފައި ހުންނަ ވީ.އެމް.އެސް، އެއްވެސް ސަބަބަކާހުރެ ނިވިއްޖެނަމަ، ނުވަތަ މިނިސްޓްރީއަށް އެ އުޅަނދުގެ ޕޮޒިޝަން ނުފެންނަކަމަށް މިނިސްޓްރީން އުޅަނދަށް އަންގައިފިނަމަ، އުޅަނދު އޮތް ސަރަޙައްދު (ޠޫލު، ޢަރުޟު ވަކިން އެނގޭނެހެން)، އުޅަނދުގެ ދުވެއްޔާއި އުޅަނދުގެ ޙަރަކާތުގެ މަޢުލޫމާތު ކޮންމެ 4 (ހަތަރެއް) ގަޑިއިރަކުން މިނިސްޓްރީން ކަނޑައަޅާ ސެންޓަރަކަށް ލިޔުމުން ފޮނުވަންވާނެއެވެ.

(ޅ) ލޭނު މަސްވެރިކަން ކުރުމަށް ލައިސަންސް ދޫކޮށްފައިވާ އުޅަނދެއްގައި ހަރުކޮށްފައި ހުންނަ 'ވެސަލް ލޮކޭޓިންގް ޑިވައިސް'، އެއްވެސް ސަބަބަކާހުރެ ނިވިއްޖެނަމަ، ނުވަތަ މިނިސްޓްރީގައި ހުންނަ ވީ.އެމް.އެސް އިން އެ އުޅަނދުގެ ޕޮޒިޝަން ނުފެންނަކަމަށް ލައިސަންސްދޭ މުއްދަތުގެ ތެރޭގައި 2 (ދޭއް) ފަހަރު ރިޕޯޓުކޮށްފައިވާނަމަ، އެ އުޅަނދުގެ ވެސަލް ލޮކޭޓިންގް ޑިވައިސްއަށް ދިމާވެފައިވާ މައްސަލަ ބަލައި ތަޙުޤީޤު ކުރަންވާނެއެވެ.