ޒަކާތު ފަންޑުން ޖޫން މަހު 107 މީހަކަށް އެހީތެރިކަން ފޯރުކޮށްދީފިއެވެ.

 މޯލްޑިވްސް ޒަކާތު ހައުސްއިން ހާމަކޮށްފައިވާ ގޮތުގައި މިދިޔަ ޖޫން މަހު ޒަކާތު ފަންޑުން 107 މީހަކަށް އެހީތެރިކަން ފޯރުކޮށްދީފިއެވެ.

އެ އިދާރާއިން އާންމުކޮށްފައިވާ ޖޫން މަހުގެ ތަފާސްހިސާބުތަކުން ދައްކާ ގޮތުގައި މި މަހު އެކި ބާވަތުގެ އެހީތެރިކަމަށް ޖުމްލަ 1.04 މިލިއަން ރުފިޔާ ވަނީ ޚަރަދުކޮށްފައެވެ. ޒަކާތު ފަންޑުން އެންމެ ބޮޑު އަދަދެއް ޚަރަދުކޮށްފައިވަނީ ކެންސަރު ބައްޔަށް ފަރުވާ ހޯދާ ފަރާތްތަކަށެވެ.

މިގޮތުން ކެންސަރު ބަލީގެ ފަރުވާއަށް 262،911 ރުފިޔާ ވަނީ ހޭދަކޮށްފައެވެ. މީގެ އިތުރުން ސިކުނޑީގެ އޮޕަރޭޝަންތަކަށް 124،580 ރުފިޔާ އަދި ކިޑްނީ ބަލިތަކަށް 97،531 ރުފިޔާ ޚަރަދުކޮށްފައިވެއެވެ. އެހެނިހެން ބަލިތަކަށް ފަރުވާ ހޯދާ ފަރާތްތަކަށް 322،327 ރުފިޔާ ދޫކޮށްފައިވާއިރު، ހިތުގެ އޮޕަރޭޝަންތަކަށް 38،164 ރުފިޔާ އަދި ގުނަވަން ބަދަލުކުރުމަށް 25،443 ރުފިޔާ ވަނީ ހޭދަކޮށްފައެވެ.

ރައީސް ޑރ. މުޙައްމަދު މުޢިއްޒުގެ ވެރިކަމުގައި ޒަކާތުގެ ކަންކަން އިތުރަށް ހަރުދަނާ ކުރުމަށްޓަކައި މޯލްޑިވްސް ޒަކާތު ހައުސްގެ ނަމުގައި ވަކި އިދާރާއެއް އުފައްދާފައިވެއެވެ. އެ އިދާރާއިން މިހާރު ޒަކާތާ ގުޅުންހުރި އެންމެހައި ކަންކަން ބަލަހައްޓަމުން ގެންދެއެވެ. ޒަކާތު ފަންޑުން ފޯރުކޮށްދޭ މި އެހީތެރިކަމަކީ ޞިއްޙީ ފަރުވާ ހޯދުމަށް ދަތިވެފައިވާ ފަރާތްތަކަށް ލިބޭ ވަރަށް ބޮޑު ލުޔެކެވެ. މި އެހީތެރިކަމުގެ ސަބަބުން ގިނަ ބަޔަކަށް ބޭނުންވާ ފަރުވާ ލިބި، އެ ފަރާތްތަކުގެ ދިރިއުޅުމަށް އެދެވޭ ބަދަލުތަކެއް އަންނާނެ ކަމަށް ބެލެވެއެވެ.