ޗައިނާ ސަރުކާރުގެ ހިލޭ އެހީގައި ކުރިއަށް ގެންދިއުމަށް ހަމަޖެހިފައިވާ މާލެ އާއި ވިލިމާލޭގެ މަގުތައް ރަނގަޅު ފެންވަރަކަށް ތަރައްޤީކުރުމުގެ މަޝްރޫޢުގެ ފީސިބިލިޓީ ދިރާސާތަށް ހެދުމުގެ ގޮތުން، މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އާއި މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) އާ ދެމެދު މަޝްވަރާގެ ބައްދަލުވުމެއް މިއަދު ކުރިއަށް ގެންދެވިއްޖެއެވެ.
މި ބައްދަލުވުމުގައި ކޮންސްޓްރަކްޝަން މިނިސްޓްރީގެ ސްޓޭޓް މިނިސްޓަރ މުޙައްމަދު ތާޢާމް އާއި ސްޓޭޓް މިނިސްޓަރ އިބްރާހިމް ނަޒީމްގެ އިތުރުން ޑެޕިއުޓީ މިނިސްޓަރ އަލީ ސަލީމް އަދި މިނިސްޓްރީގެ ޓެކްނިކަލް ޓީމް ބައިވެރިވެވަޑައިގެންނެވިއެވެ. އަދި އެމްޑަބްލިއުއެސްސީގެ ފަރާތުން އެ ކުންފުނީގެ ސީއީއޯ އަބްދުލް މަތީން މުޙައްމަދުގެ އިތުރުން އެ ކުންފުނީގެ ޓެކްނިކަލް ޓީމްވެސް ބައިވެރިވެވަޑައިގެންނެވިއެވެ. މިބައްދަލުވުމުގައި، މަޝްރޫޢުއަށް ބޭނުންވާ ފީސިބިލިޓީ ޓެސްޓް ހެދުމާއި މަސައްކަތަށް ދާނެ ހަރަދުތަކުގެ އިތުރުން މަގުތައް ހަދަމުންދާއިރު ދިމާވާ ޓެކްނިކަލް މައްސަލަތައް ކުޑަކުރެވޭނެ ގޮތްތަކާ މެދު މަޝްވަރާކުރެވުނެވެ.
ކޮންސްޓްރަކްޝަން މިނިސްޓްރީގެ އަމާޒަކީ މަގުތައް ހަދަމުންދާއިރު މާލޭގެ އެންމެ އަވަހަށް ފެންބޮޑުވާ މަގުތަކަށް އިސްކަމެއް ދީގެން އެކަން ކުރުންކަމަށާއި ޕްރޮޖެކްޓް ފެށުމާއެކު މިކަމުގައި ޝާމިލުވާ ހުރިހާ ސްޓޭކްހޯލްޑަރުންގެ ފުރިހަމަ އެއްބާރުލުން ދެއްވުމަށްވެސް މިނިސްޓްރީއިން އެދިވަޑައިގަތެވެ. ރަ
އީސުލްޖުމްހޫރިއްޔާ ޑރ. މުޙައްމަދު މުޢިއްޒު ޗައިނާއަށް ކުރެއްވި ފުރަމާނަ ދަތުރުފުޅުގައި ޗައިނާ ސަރުކާރުން ދިވެހިރާއްޖެއަށް ދެއްވުމަށް އެއްބަސްވި ހިލޭ އެހީގެ ބޮޑުބައެއް ހޭދަކުރެއްވުމަށް ނިންމަވާފައިވަނީ މާލޭގެ މަގުތައް ތަރައްޤީކުރުމަށްކަމަށްވެސް އެމަނިކުފާނުވަނީ ދަތުރުފުޅަށްފަހު ވިދާޅުވެފައެވެ.
