މޯލްޑިވްސް ޕޮލިޓެކްނިކުން އިސްނަގައިގެން ދިވެހިރާއްޖޭގެ ކޮންސްޓްރަކްޝަން ނުވަތަ އިމާރާތްކުރުމުގެ ދާއިރާއަށް އަމާޒުކޮށް ކޮންފަރެންސް އެއް ބޭއްވުމާއި ގުޅޭގޮތުން ކޮންސްޓްރަކްޝަން ދާއިރާގެ އިސްބޭފުޅުންނާ މަޝްވަރާކޮށްފިއެވެ.

ސެންޓްރަލް އިންޖީނިއަރިންގ ކޮންސަލްޓެންސީ ބިއުރޯ އޮފް ސްރީ ލަންކާއާއި ޕޮލިޓެކްނިކުން ގުޅިގެން ބޭވުމަށް މަޝްވަރާކުރެވޭ މިކޮންފެރެންސްގައި، ދިވެހިރާއްޖޭގެ ކޮންސްޓްރަކްޝަން ނުވަތަ އިމާރާތްކުރުމުގެ ދާއިރާއަށް އަންނަ ބަދަލުތަކާއި މި ދާއިރާއާއި ގުޅޭ އިތުރު މުޙިއްމު މަޢުލުމާތު ޒުވާނުންނަށް ފޯރުކޮއްދިނުމަށް ކުރެވިދާނެ މަސައްކަތްތަކާއި ގުޅޭގޮތުން މަޝްވަރާކުރެވޭނެއެވެ.

20 އޮގަސްޓް ވީ އަންގާރަ ދުވަހު ރާއްޖެގެ ކޮންސްޓްރަކްޝަން ދާއިރާގެ ބޭފުޅުންނާއިެކު ބޭއްވި މި ބައްދަލުވުމުގައި މޯލްޑިވިސް ޕޮލިޓެކްނިކްގެ ސީއީއޯ، ޛޫޝާން ކަމާލުއްދިންގެ އިތުރުން އެ އިދާރާގެ ބައެއް އިސްބޭފުޅުން ވަނީ ބައިވެރިވެވަޑައިގަންނަވާފައެވެ. އަދި ކޮންސްޓްރަކްޝަން ދާއިރާގެ ފަރާތުން އެ ދާއިރާގައި މަސައްކަތްކުރައްވާ ބައެއް ވިޔަފާރިވެރިން ވަނީ މި ބައްދަލުވުމުގައި ބައިވެރިވެވަޑައިގަންނަވާފައެވެ.

މޯލްޑިވިސް ޕޮލިޓެކްނިކް އަކީ ތަފާތު ދާއިރާތަކުގެ އެކި ކުންފުނިތަކާއި މުއައްސަސާތަކާއި ގުޅިގެން ދިވެހިރާއްޖޭގެ ކުރިއެރުމާއި ތަރައްޤީއަށް ބޭނުންވާ މަސައްކަތްތެރިކަމުގެ ދާއިރާތަކުން ޒުވާނުން ތަމްރީނުކުރުމާއި އެ ޒުވާނުންގެ ހުނަރުތައް އިޢާދަކުރުމަށް މަސައްކަތްކުރަމުން އަންނަ އިދާރާއެކެވެ.