އާމްސް ޓްރޭޑް ޓްރީޓީ (އޭ.ޓީ.ޓީ.) ކޮންވެންޝަން އަކީ ބައިނަލްއަޤްވާމީ މަޝްރަހުގައި ހަތިޔާރުގެ ވިޔަފާރީ ރެގިއުލޭޓްކޮށް، ހަތިޔާރު ބަދަލުކުރުމުގެ މިންގަނޑުތައް ޤާއިމުކޮށް، ގަވާއިދާ ޚިލާފަށް ކުރާ ވިޔަފާރީގެ މުއާމަލާތްތައް ހުއްޓުވައި ނައްތާލުމަށް މަސައްކަތް ކުރާ ބައިނަލްއަޤްވާމީ މުއާހަދާއެކެވެ.
މި މުއާހަދާއަށް އަމަލުކުރަން ފަށާފައިވަނީ 24 ޑިސެމްބަރ 2014 ގައެވެ. މި މުއާހަދާގައި 112 ޤައުމަކުން ބައިވެރިވެފައިވާއިރު 29 ޤައުމަކުން ވަނީ މުއާހަދާގައި ސޮއިކޮށް، ނަމަވެސް މިހާތަނަށް ތަސްދީގުކޮށްފައިނުވެއެވެ.
ދިވެހިރާއްޖެއިން މިމުއާހަދާ ތަސްދީޤްކޮށްފައިވަނީ 27 ސެޕްޓެމްބަރ 2019 ގައެވެ. އަދި މިމަހު 19 އިން 23 އަށް ކުރިއަށް މިދަނީ ކޮންފަރެންސް އޮފް ދަ ސްޓޭޓް ޕާޓީސް ޓު ދަ އާމްސް ޓްރޭޑް ޓްރީޓީގެ 10 ވަނަ ބައްދަލުވުމެވެ.
މި ބައްދަލުވުމުގައި އޯގަނައިޒޭޝަން އޮފް އިސްލާމިކް ކޯޕޭޝަން (އޯ.އައި.ސީ.) ގެ ފަރާތުން ދިވެހިރާއްޖެއިންވަނީ 19 އޯގަސްޓް 2024 ގައި ބަޔާނެއް ދީފިއެވެ. މި ބާޔާން ދިވެހިރާއްޖޭގެ ފަރާތުން ދެއްވީ ޖެނީވާގައި ހުންނަ އެކުވެރި ދަޢުލަތްތަކުގެ މަރުކަޒުތަކަށް ދިވެހިރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ސަލްމާ ރަޝީދު އެވެ.
އެ ކަމަނާ ދެއްވި ގުޅިފައިވާ މިބަޔާނުގައި އެމްބެސެޑަރ ޑރ. ސަލްމާ ވަނީ އިސްރާއީލުން ފަލަސްޠީނުގެ ރައްޔިތުންނަށް ދެމުން ގެންދާ ލާއިންސާނީ 'ޖެނޮސައިޑް' އާ އެއްފަދަ އަމަލުތަކާއި ޣައިރުޤާނޫނީ ގޮތެއްގައި ފަލަސްތީނުގެ ބިންތައް ހިފަމުންދާ ދިއުމަށް ހިތްވަރުލިބޭހެން އާމްސް ޓްރޭޑް ޓްރީޓީ ތަސްދީޤުކޮށްފައިވާ ގައުމުތަކާއި އެ މުޢާހަދާގައި ސޮއިކޮށްފައިވާ ގައުމުތަކުން އިސްރާއީލަށް ހަތިޔާރު ވިއްކަމުން ގެންގާތީ އެކަމާ ކަންބޮޑުވުން ފާޅުކުރައްވާފައެވެ.
