އިލެކްޓްރޯނިކް ގަވަރމަންޓް ޕްރޮކިއުމަންޓް (އީ-ޖީޕީ) ސިސްޓަމް އަކީ ޓްރެޑިޝަނަލް ޕްރޮކިއުމަންޓް މެތަޑްތަކުގެ ޑިޖިޓަލައިޒޭޝަން ޕްރޮސެސްއެކެވެ. މި ގޮތުން ފުޅާ ދާއިރާއެއްގައި ދިރާސާކޮށް ރާއްޖެއަށް އެންމެ އެކަށީގެންވާ ނިޒާމެއްގެ ގޮތުގައި އިހްތިޔާރުކުރެވިފައިވަނީ އެސް.އޭ.ޕީ އަރީބާއެވެ. މި ނިޒާމް ގާއިމްކުރުމުގެ މައިގަނޑު މަގުސަދަކީ ދައުލަތުގެ ޕްރޮކިއުމަންޓް ހަރަކާތްތަކުގެ ޓްރާންސްޕޭރެންސީ، އެފިޝަންސީ އަދި ކޮސްޓް އިފެކްޓިވްކަން އިތުރުކުރުމެވެ. މި ފެށުނު މަސައްކަތް ރަމްޒުކޮށްދެނީ ޕްރޮކިއުމަންޓް ޕްރޮސެސްތައް ޒަމާނީކޮށް ކުރިއެރުވުމަށް ކުރާ މަސައްކަތަށް ލިބުނު ވަރަށް ބޮޑު ކުރިއެރުމެކެވެ.
މި މަސައްކަތުގެ އެންމެ ބޮޑު އެއް ބޭނުމަކީ ޚަރަދު ކުޑަކޮށް ވަގުތު ސަލާމަތްކުރުމެވެ. ޕްރޮކިއުމަންޓް ޕްރޮސެސްތައް އޮޓޮމޭޓްކޮށް، ސްޓްރީމްލައިންކޮށްގެން، މިހާރު ހިނގާ އިދާރީ ޚަރަދުތައް ކުޑަކުރެވި، ޕްރޮސެސިންގ ވަގުތުތައް ކުރުވެ، ވަސީލަތްތައް މިހާރަށްވުރެ ހަރުދަނާގޮތެއްގައި ބޭނުންކުރުމަށް މަގުފަހިވެގެންދާނެއެވެ.
އަރީބާ ސިސްޓަމާއެކު މިހާރު ތަފާތު އެކި ޕްލެޓްފޯމްތަކުން ކުރިއަށްގެންދާ ޕްރޮކިއުމަންޓުގެ ކަންތައްތައް އެއް ޕްލެޓްފޯމަކުން ކުރިއަށް ގެންދެވޭނެއެވެ. މިކަމުގެ ސަބަބުން ސަޕްލަޔަރުންނަށް އެއް ޕްލެޓްފޯމަކުން ދައުލަތުގެ ހުރިހާ ޕްރޮކިއުމަންޓުތަކުގައި ބައިވެރިވުމުގެ މަގުފަހި ވެގެންދާނެއެވެ. އަދި މުއާމަލާތްތައް ފަސޭހަވެ، ކޯޑިނޭޝަން ރަނގަޅުވެ، ޕަބްލިކް ފައިނޭންސް ފަންކްޝަންތަކުގައި އަވަސް ނިންމުންތަކެއް ނިންމުމަށް މަގުފަހިވެގެންދާނެ އެވެ.
މީގެ އިތުރުން، އަރީބާއަކީ މިހާރުގެ ބޭނުންކުރާ އެސް.އޭ.ޕީ ސިސްޓަމާ ފަސޭހަކަމާއެކު އިންޓަރގްރޭޓްކުރެވޭ ސިސްޓަމަކަށްވުމުން، ޕްރޮކިއުމަންޓް ޕްރޮސެސްތަކަށް އިތުރު ކުރިއެރުންތަކެއް ލިބިގެން ދާނެއެވެ.
މި ސިސްޓަމާއެކު ޚަރަދުތަކުގެ ޓްރާންސްޕޭރެންސީވެސް އިތުރުވެގެންދާނެއެވެ. އައު ނިޒާމުގެ ސަބަބުން ޕްރޮކިއުމަންޓްގެ ޑޭޓާތަކާއި ޕްރޮކިއުމަންޓާ ގުޅޭ އިތުރު މައުލޫމާތުތައް ފަސޭހައިން ލިބޭނެއެވެ. މިކަމުގެ ސަބަބުން ޚަރަދުތައް ރަނގަޅަށް ޓްރެކްކޮށް މެނޭޖްކޮށް، ވަގުތުން ރިޕޯޓްތައް އުފެއްދުމަށް މަގުފަހިވެގެންދާނެއެވެ.
