ދިވެހިރާއްޖޭގެ ކުޅިވަރަށް ބައިގަރުނަށްވުރެ ގިނަ ދުވަހު ޚިދުމަތްކޮށްދެއްވާފައިވާ މައްލާ ޅަތުއްތުގެ ހަނދާނުގައި ތަޢުޒިޔާގެ ދަފުތަރެއް ހުޅުވައިފި އެވެ.

ރާއްޖޭގައި އުފެދުނު އެންމެ މޮޅު އެއް ފުޓުބޯޅަ ރެފްރީ މައްލާ ޅަތުއްތުގެ ހަނދާނުގައި ހުޅުވި ތައުޒިޔާގެ ދަފުތަރު ހުޅުއްވައިދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އެވެ. އިއްޔެ ޒުވާނުންގެ މަރުކަޒުގައި ހުޅުވި ދަފްތަރުގައި ލިޔުމުގެ ފުރުސަތު އަންނަ ހޮނިހިރު ދުވަހުގެ ނިޔަލަށް ހުޅުވިފައި ހުންނާނެ އެވެ.

ރާއްޖޭގެ ފުރަތަމަ ފީފާ ރެފްރީގެ މައްލާ ޅަތުއްތުގެ ހަނދާނުގައި ތައުޒިޔާގެ ދަފަތްރެއް ހުޅުވުމުގެ ރަސްމިއްޔާތުގައި ވަޒީރު ރާފިޢުގެ އިތުރުން ކުރީގެ ރެފްރީންނާއި ކުޅިވަރުގެ އިސްފަރާތްތައް ވަނީ ބައިވެރިވެފައެވެ.

މައްލާ ޅަތުއްތަކީ ފީފާ ބެޖު ޙާސިލްކުރެއްވި ފުރަތަމަ ދިވެހި ރެފްރީއެވެ. އޭނާވަނީ 1969 އިން 1995 އާ ހަމައަށް ރެފްރީކަން ކުރައްވާފައެވެ. ދިވެހި ކުޅިވަރަށް ޚިދުމަތްކުރުމުގެ ރޮނގުން ޝަރަފުވެރިކަމުގެ ޤައުމީ އިނާމު، 2021 ވަނަ އަހަރު މައްލާއަށް ލިބިވަޑައިގެންފައިވެއެވެ.

މައްލާ ޅަތުއްތަކީ ރެފްރީކަން ކުރެއްވުމުގެ އިތުރުން ރެފްރީން ބިނާކުރުމުގައިވެސް ގިނަ މަސައްކަތްތަކެއް ކުރެއްވި އެވެ. އޭނާ ވަނީ 1975 އިން ފެށިގެން ރެފްރީން ބިނާކުރުމުގެ މަސައްކަތް މާލެ އާއި އަތޮޅު ތެރޭގައި ކުރައްވާ ގިނަ ކޯސްތަކެއް ހިންގަވާފަ އެވެ. އަދި ރާއްޖޭގައި ފުރަތަމަ ފަހަރަށް އަންހެން ރެފްރީން ބިނާކުރުމަށް، 2019 ވަނަ އަހަރު އިސްވެ މަސައްކަތް ފެއްޓެވީވެސް މައްލާ ޅަތުއްތެވެ.

މައްލާ ޅަތުއްތު އަވަހާރަވީ އިންޑިއާގެ ޓްރިވެންޑްރަމްގެ ހޮސްޕިޓަލެއްގައި އައިސީޔޫގައި ފަރުވާދެމުންދަނިކޮށް މިދިޔަ ބުރާސްފަތި ދުވަހުގެ މެންދުރުގެ ވަގުތެއްގަ އެވެ.