މިނިސްޓަރ ތާރިޤް އިބްރާހިމް ފުވައްމުލަކު ސިޓީ އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ބައްދަލުކުރައްވައިފިއެވެ.
ކުނި މެނޭޖްކުރުމުގެ މަސައްކަތްތަކާ ގުޅޭގޮތުން މަޝްވަރާކުރެއްވުމަށް، މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު ތާރިޤް އިބްރާހިމް، ފުވައްމުލަކުސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއު.ޑީ.ސީ) އާ ބައްދަލުކުރައްވައިފިއެވެ.
މި ބައްދަލުވުމުގައި، ކުނި މެނޭޖްކުރުމުގެ ދާއިރާގައި އަންހެނުންނަށް ތަމްރީނު ދިނުމުގެ މުހިންމުކަން މިނިސްޓަރ ތާރިޤް ފާހަގަކުރެއްވިއެވެ. އަދި ރަށުގެ ތިމާވެށި ރައްކާތެރިކުރުމަށް އެކަށީގެންވާ ބަދަލުތަކެއް ގެނައުމުގައި ޑަބްލިއު.ޑީ.ސީގެ ދައުރު މުހިންމުކަންވެސް އެމަނިކުފާނު ފާހަގަކުރެއްވިއެވެ.
ފުވައްމުލަކުގައި ކުނި މެނޭޖްކުރުމުގެ މަސައްކަތްތައް ހަރުދަނާކުރުމަށް ޑަބްލިއު.ޑީ.ސީއިން ކުރަމުންދާ މަސައްކަތްތަކާ ގުޅޭގޮތުން މަޢުލޫމާތު ހިއްސާކުރުމަށް މި ބައްދަލުވުމުގައި ފުރުސަތު ލިބުނެވެ. އަދި މި ދާއިރާގައި އިތުރަށް ކުރެވިދާނެ ކަންތައްތަކާ ގުޅޭގޮތުން ދެފަރާތުން މަޝްވަރާކުރެވުނެވެ.
ކުނި މެނޭޖްކުރުމުގެ ދާއިރާގައި އަންހެނުންގެ ބައިވެރިވުން އިތުރުކުރުމަކީ ސަރުކާރުގެ ސިޔާސަތެއްކަމަށް މިނިސްޓަރ ވިދާޅުވިއެވެ. އަދި މި ދާއިރާއިން އަންހެނުންނަށް ވަޒީފާގެ ފުރުސަތުތައް އިތުރުކުރުމަށް ސަރުކާރުން މަސައްކަތްކުރަމުންދާ ކަމަށްވެސް އެމަނިކުފާނު ވިދާޅުވިއެވެ.
