ލާމަރުކަޒީ ޤާނޫނަށް އިޞްލާޙު ހުށައެޅުމަށް ޤައުމީ ޔުނިވާރސިޓީން ހަދާ ދިރާސާ ރިޕޯރޓް އަންނަ އޯގަސްޓްމަހުގެ މެދުތެރެ ހިސާބުގައި ނިމޭނެ ކަމުގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

އެ މަނިކުފާނު ވިދާޅުވީ ލާމަރުކަޒީ ޤާނޫނަށް އިޞްލާޙީ ބަދަލު ގެންނަން ވާނީ ފަހަރަކު ތަންކޮޅެއް ބަދަލުކޮށް، ބާއޮޑިއެއްގައި ގަނޑުލާ އުޞޫލުން ނޫން ކަމަށާ، މުޅި ނިޒާމަށް އޭގެ ސަބަބުން ހެޔޮ ބަދަލުތައް ގެނެވޭނެ ގޮތެއްގެ މައްޗަށް ކަމުގައި އެ މަނިކުފާނު ބަޔާންކުރެއްވިއެވެ.

މިނިސްޓަރ ވިދާޅުވީ ރިޕޯރޓް ލިބުނީމަ އޭގެ އަލީގައި އެ ކަމާ ގުޅުން ހުރި މުއައްސަސާތަކާއި، ސްޓޭ ކްހޯލްޑަރުންނާއި، އާންމު ރައްޔިތުންނާއި އަދި ގިނަ ބައެއްގެ ރައުޔު ހޯދުމާއެކު ލާމަރުކަޒީ ނިޒާމަށް ގެންނަން ޖެހޭ އިޞްލާޙުތައް ދެނެގަނެ އެ ކަމުގެ މައްޗަށް މަސައްކަތް ކުރިއަށް ގެންދެވޭނެ ކަމަށެވެ.