ރ.ދުވާފަރު ކައުންސިލްގެ ބައެއް އިސްބޭފުޅުން ދިވެހިރާއްޖޭގެ އިސްލާމިކް ޔުނިވާސިޓީ (އައިޔޫއެމް)އަށް ޒިޔާރަތްކުރައްވައި، އެ ޔުނިވާސިޓިގެ އިސްބޭފުޅުންނާއި ބައްދަލުކުރައްވައިފިއެވެ.
މި ބައްދަލުވުގެ މަޤްސަދަކީ ރ.ދުވާފަރު ކައުންސިލާއި ގުޅިގެން އެރަށުގައި އައިޔޫއެމްގެ ކޯސްތަށް ކުރިއަށް ގެންދިޔުމާއި ގުޅޭގޮތުން މަޝްވަރާކުރުމެވެ. އެގޮތުން، ޤިރާޔަތު ކޯސްތަކާއި، ހިފްޡްކުރުމުގެ ކޯހުގެ އިތުރުން ޤުރުޢާނާއި ގުޅޭ ކޯސްތަކާއި އެހެނިހެން ދާއިރާތަކުގެ ކޯސްތަށް ރ.ދުވާފަރުގައި ކުރިއަށް ގެންދިޔުމާއި ގުޅޭގޮތުން މި ބައްދަލުވުމުގައި މަޝްވަރާކުރައްވާފައިވެއެވެ.
މި ބައްދަލުވުމުގައި، އައިޔޫއެމްގެ ފަރާތުން އެ ޔުނިވާސިޓީގެ ވައިސް ޗާންޗެލަރ، ޑރ. ޢަލީ ޒާހިރްގެ އިތުރުން އެ ޔުނިވާސިޓިގެ ބައެއް އިސްބޭފުޅުން ވަނީ ބައިވެރިވެވަޑައިގަންނަވާފައެވެ. އަދި ރ.ދުވާފަރު ކައުންސިލްގެ ފަރާތުން އެ އިދާރާގެ ބައެއް އިސް ބޭފުޅުން ވެސް ވަނީ ބައިވެރިވެވަޑައިގަންނަވާފައެވެ.
ދިވެހިރާއްޖޭގެ އިސްލާމިކް ޔުނިވާސިޓީ (އައިޔޫއެމް) އަކީ އަތޮޅު ތެރޭގައި މަތީ ތަޢުލީމު ފުޅާކުރުމަށް އެކި ރަށްރަށުގެ ކައުންސިލްތަކާއި ޖަމިއްޔާ ޖަމާޢަތްތަކާއި ގުޅިގެން މިހާރު ވެސް، ތަފާތު އެތަށް ކޯސްތަކެއް ކުރިއަށް ގެންދަމުންދާ ޔުނިވާސިޓީއެކެވެ.
