ވީއައިއޭ ގައި ހުޅުވި މޮނިއުމެންޓު - ފޮޓޯ: އެމްއޭސީއެލް
ވެލާނާ އިންޓަނޭޝަނަލް އެއާޕޯޓު (ވީއައިއޭ) އަށް އަންނަ ފަރާތްތަކަށް މަރުހަބާ ކިޔުމުގެ ގޮތުން ތައްޔާރު ކޮށްފައިވާ މޮނިއުމެންޓު ހުޅުވައިފި އެވެ.
ވެލާނާ އިންޓަނޭޝަނަލް އެއާޕޯޓު [ވީއައިއޭ] ގައި ބޭއްވި ހައްސަ ރަސްމިއްޔާތެއްގައި ވަނީ މަރުހަބާ ކިޔުމަށް ތައްޔާރު ކޮށްފައިވާ މޮނިއުމެންޓް ހުޅުވާފައެވެ. އެ މޮނިއުމެންޓް ހުޅުވައި ދެއްވީ އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދުއާއި އެ ކުންފުނީގެ ޑެޕިއުޓީ މެނޭޖިން ޑިރެކްޓަރު މުހައްމަދު ލަމްއާން އަދި މުޖުތަބާ ލަތީފެވެ.
ވީއައޭގައި ހުޅުވި މި މޮނިއުމެންޓުގައި ވެލާނާ އެއާޕޯޓުގެ ނަން ބޯޑަކާއި އޭގެ މަތީގައި ބޮޑުގަޑިއެއް ބަހައްޓާފައިވެއެވެ. އަދި ވެލާނާ އެއާޕޯޓުގެ އާ ޓާމިނަލްގައި ބޭނުންކުރާ ދިވެހި ގަލުވަޑާމުގެ ފަރުމާވެސް މި މޮނިއުމެންޓުގައި ބޭނުންކޮށްފައިވެއެވެ.
އެ މޮނިއުމެންޓް ހުންނަނީ ސިނަމާލެ ބުރިޖާ ގުޅިފައިވާ ހަލިމަގުން އެއާޕޯޓަށް ވަންނަ ދިމާލުގައި ޕޮލިސް ޕޯޓް ކައިރީގައެވެ. އެމްއޭސީއެލްއިން ބުނީގޮތުގައި އެ މޮނިއުމެންޓްގައި ހަރުކޮށްފައިވާ އެލްއީޑީ ސްކްރިނުން އެއާޕޯޓްގައި މިހާރު ކުރިއަށްދާ ކަންތައްތައް ފެންނާނެ ކަމަށެވެ. މީގެ އިތުރުން އެމްއޭސީއެލް އިން ބުނީ މިއީ އެއާޕޯޓްގެ މަލަމަތި ރީތިކުރުމަށް ކުރެވޭ މަސައްކަތުގެ ތެރެއިން ބެހެއްޓި މޮނިއުމެންޓެއް ކަމަށެވެ.
އެމްއޭސީއެލް އިން ހާމަ ކުރެއްވި ގޮތުގައި، މިހާރު ކަސްޓަމަރުންނަށް ފަސޭހަވާނެހެން އެއާޕޯޓްގެ ތްރެފިކް ފްލޯއަށް ބަދަލުތައް ގެނެއުމުގެ މަސައްކަތް ވެސް އެ ކުންފުނިން ކުރަމުންދެއެވެ.
ވީއައިއޭގައި ތައްޔާރުކުރި މޮނިއުމެންޓަކީ މީގެ ކުރިން އެއްވެސް ސަރުކާރަކުން ކޮށްފައިވާ މަސައްކަތެއްކަމުގައި ނުވިނަމަވެސް މިސަރުކާރުން މިވަނީ މި މޮނިއުމެންޓް ތައްޔާރުކޮށް ހުޅުވައިލާފައެވެ.
