އޮސްޓްރޭލިއާ ސަރުކާރުން ރާއްޖެއަށް ކަނޑައަޅާފައިވާ ސަފީރު ޑޭވިޑް ޖެސަޕް އަދި އެ ކޮމިޝަންގެ ޑެޕިއުޓީ ހައިކޮމިޝަނަރ އެންޑްރިއު ހޮޖެސް އާއި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ އިސް އޮފިޝަލުންނާއި ބައްދަލުކުރައްވައިފިއެވެ.
މި ވުޒާރާގެ ފަރާތުން މި ބައްދަލުވުމުގައި ބައިވެރިވެވަޑައިގަތީ މިނިސްޓަރގެ ނައިބު އައިމިނަތު ނަމްޒާ، ޕްރޮގްރާމް އޮފިސަރ ޢާއިޝަތު ސާހާ ސަބާހް އަދި އިންޓަރނޭޝަނަލް ރިލޭޝަންސް އޮފިސަރ އާމިނަތު އާނިމާއެވެ.
މި ބައްދަލުވުމުގައި ވަނީ މިވުޒާރާގެ އިޚުތިޞާޞްގެ ތެރޭގައި ހިމެނޭ މަސައްކަތްތަކާއި މިވަގުތު އެންމެ ބޮޑު ސަމާލުކަމެއް ދީގެން ކުރިއަށް ގެންދެވޭ ޕްރޮގްރާމުތަކުގެ މައްޗަށް އަލިއަޅުވާލާފައެވެ. މިގޮތުން "ހާލު ކިހިނެއް؟" ޕްރޮގްރާމާއި އިޖުތިމާޢީ ބަދަހި މަދަދުވެރިން (އިބަމަ) ޕްރޮގްރާމްގެ އިތުރުން، ޑޭޓާބޭސް މެނޭޖްމަންޓް ސިސްޓަމެއް އެކުލަވާލުމަށް ކުރެވެމުން އަންނަ މަސައްކަތްތަކާ ގުޅޭ ގޮތުން ވަނީ މަޝްވަރާކޮށްފައެވެ. އޭގެ އިތުރުން އިސްރަށްވެހިންނާއި، ކުޑަކުދިންނާއި، އަންހެނުންނާއި، ނުކުޅެދުންތެރިކަން ހުންނަ ފަރާތްތަކުގެ ހައްޤުތައް ހިމާޔަތްކޮށް، އެފަރާތްތަކުގެ ދިރިއުޅުން އިތުރަށް ފާގަތިކުރުމަށް ކުރެވިފައިވާ އަދި ކުރެވެމުން އަންނަ މަސައްކަތްތަކާ ގުޅޭ ގޮތުން ވަނީ އެ ކޮމިޝަނާއި މަޢުލޫމާތު ހިއްސާކޮށްފައެވެ.
އަދި މި ދާއިރާއިން ދިވެހންގެ ފަންނީ ޤާބިލުކަން އިތުރުކުރުމަށް އޮސްޓްރޭލިއަން އޭޖެންސީ ފޯ އިންޓަނޭޝަނަލް ޑެވެލޮޕމެންޓް (އޮޒެއިޑް) އިން މަތީ ތަޢުލީމު ހާސިލުކުރުމަށް ދިވެހިންނަށް ދެމުންގެންދާ ސްކޮލަޝިޕްތަކުގެ ފުރުސަތުތަކާއި ބެހޭގޮތުންވެސް ވަނީ މި ބައްދަލުވުމުގައި މަޝްވަރާކުރެވިފައެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން މުސްތަޤްބަލުގައި ކުރުމަށް ރޭވިފައިވާ މަސައްކަތްތަކާއި މަޝްރޫޢުތަކުގައި އެހީތެރިކަން ފޯރުކޮށްދިނުމަށް އިތުރު ބައްދަލުވުންތަކެއް ކުރިއަށްގެންދަން ބޭނުންވާކަމަށް އޮސްޓްރޭލިއަން ހައިކޮމިޝަނުގެ ފަރާތުން ވަނީ ފާހަގަކުރައްވާފައެވެ.
