އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން، އިޖުތިމާއީ ހަމަޖެހުން ގާއިމްކުރުމާ އާއިލީ ތަރައްގީއަށް ކުރާ ތަފާތު މަސައްކަތްތަކުގައި އެހީތެރިކަން ފޯރުކޮށްދީ ހިއްސާދާރެއްގެ ގޮތުގައި މަސައްކަތް ކުރުމާއި ގުޅޭގޮތުން ކްރޮސްރޯޑްސް މޯލްޑިވްސްގެ މުއައްސިސުންނާ މަޝްވަރާކޮށްފިއެވެ.
މި ބައްދަލުވުމުގައި އެ ފަރާތުން ވަނީ ނުކުޅެދުންތެރިކަން ހުންނަ ފަރާތްތަކާއި، ދައުލަތުގެ ބެލުމުގެ ދަށުގައި ތިބޭ ކުދިންގެ ތެރެއިން ވަޒީފާއަށް ނިކުތުމަށް ތައްޔާރުވާ ކުދިންނަށް އިންޓާންޝިޕް ފުރުސަތުތައް ފަހިކޮށްދިނުމުގެ އިތުރުން، އާމްދަނީ ހޯދުމަށް މަގުފަހިކޮށްދިނުމުގެ ގޮތުން ތަފާތު އެހީތެރިކަން ފޯރުކޮށްދިނުމާއެކު، އާއިލާތަކުގެ ހާލަތު ރަނގަޅުކުރުމަށް މި ވުޒާރާއިން ހިންގާ ޕްރޮގްރާމުތަކަށް އެހީތެރިކަން ފޯރުކޮށްދެއްވާނެކަމުގެ ޔަގީންކަން ދެއްވާފައެވެ.
އިޖުތިމާއީ ދުޅަހެޔޮކަން ކަށަވަރުކުރުމާ އެއްވެސް ފަރުދަކު ބާކީ ނުވާނެހެން އެންމެން ޝާމިލުވާ އުފާވެރި މުޖުތަމައެއް ބިނާކުރުމަށް ކުރެވޭ މަސައްކަތްތަކުގައި ކްރޮސްރޯޑްގެ ޓީމުން އަބަދުވެސް އެއްބާރުލުން ދެއްވާ ޝައުގުވެރިކަމާއެކު ކުރައްވަމުން ގެންދަވާ މަސައްކަތްތައް މި ވުޒާރާއިން އުފަލާއެކު ފާހަގަކޮށް އެކަމަށްޓަކައި ޝުކުރު އަދާކުރަމެވެ.
