އާބާދީގައި 600 މީހުން ހަމަނުވާ ހދ. ހިރިމަރަދޫ ރައްޔިތުން މާލެ އަތޮޅުގެ ވެރިރަށް، ތުލުސްދޫއަށް ބަދަލުވާން ބޭނުންވާ ކަމަށް ހާމަކޮށްފިއެވެ.
މި ކަން ހާމަކުރެއްވީ ހިރިމަރަދޫ ކައުންސިލާއެކު ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރު ބޭއްވެވި ބައްދަލުވުމުގައި، ހިރިމަރަދޫ ކައުންސިލުގެ މެންބަރުންނެވެ.
މި އަހަރުގެ ފެބުރުވަރީމަހު ޢިއްޒަތްތެރި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހިރިމަރަދުއަށް ވަޑައިގެން އެ ރަށު ކައުންސިލާ ވަނީ ބައްދަލުކުރައްވާފައެވެ. އެ ބައްދަލުވުމުގައި ރަށުގެ ތަރައްޤީއަށް ޓަކައި ކުރަން ބޭނުންވާ ކަންކަން އެ ކައުންސިލުން ވަނީ ރައީސުލްޖުމްހޫރިއްޔާއާ ހިއްސާކުރައްވާފައެވެ.
ވަރަށް ކުޑަ އާބާދީއެެއް ދިރިއުޅޭ ހިރިމަރަދޫ ރައްޔިތުންނަށް ބޭނުންވާ ޚިދުމަތްތައް ރަށުން ނުލިބޭތީ، އެ ރަށުގެ ގިނަ ޢަދަދެއްގެ ރައްޔިތުން އަންނަނީ މާލެއަށާއި، ކުޅުދުއްފުށީ ސިޓީއަށް ހިޖުރަކުރަމުންނެވެ.
ހިރިމަރަދޫ ކައުންސިލާއެކު ވަޒީރު ބޭއްވެވި މި ބައްދަލުވުމުގައި، ހިރިމަރަދޫ ރައްޔިތުން އެދިލެއްވި ފަދައިން އެ ރަށު މީހުން ތުލުސްދޫއަށް ބަދަލުވުމަށް ކުރަމުންދާ މަސައްކަތުގައި ވަޒީރަށް ކޮށްދެވެން އޮތް ހުރިހައި މަސައްކަތެއް ކޮށްދެއްވާނެ ކަމުގެ ޔަޤީންކަން ވަޒީރު ވަނީ ދެއްވައިފައެވެ.
