ފާއިތުވި 10 ދުވަސްތެރޭ އިސްރާއީލު އަސްކަރިއްޔާއިން ޣައްޒާގައި އދން ހިންގާ 6 ސްކޫލަކަށް އަމާޒުކޮށް ހަމަލާދީފިއެވެ. 

އެގޮތުން ފާއިތުވި 24 ގަޑިއިރު ތެރޭގައި އިސްރާއީލުން ވަނީ ޣައްޒާގައި އދން ހިންގާ ސްކޫލަކަށް ހަމަލާދީފައެވެ. މިސްކޫލަކީ އިސްރާއީލުން "ސޭފް ޒޯން" ގެ ގޮތުގައިވެސް ކަނޑައަޅާފައިވާ ސަރަހައްދުގައި ހުރި ސްކޫލެކެވެ. މިހަމަލާގައި މަދުވެގެން ފަލަސްތީނުގެ 42 މީހުންގެ ފުރާނަ ގެއްލިގެންގޮސްފައިވާއިރު އެތައް ބަޔަކު ޒަޚަމްވެފައިވާކަމަށް ފަލަސްތީނުގެ އޮފިޝަލުން ުނެއެވެ. 

މި ސްކޫލްތަކަކީ ޣައްޒާގައި ގެދޮރު ގެއްލިފައިވާ އެތައް ސަތޭކަ ބަޔަކު ބޯހިޔާވަހިކަން ހޯދަމުން އަންނަ ސްކޫލްތަކެވެ. 

އދ ގެ ފަލަސްތީނުގެ ރެފިޔުޖީންނާ ބެހޭ އެޖެންސީން ބުނާ ގޮތުގައި މިދިޔަ އަހަރުގެ އޮކްޓޯބަރ މަހުން ފެށިގެން އިސްރާއީލުން ހިންގަމުން ގެންދާ ޤަތުލުއާންމުގައި ޣައްޒާގައި ހުރި ސްކޫލްތަކުގެ ތެރެއިން 70 އިންސައްތަ ސްކޫލަށް އިސްރާއީލުން ވަނީ ހަމަލާދީފައެވެ. މީގެތެރެއިން 95 އިންސައްތަ ސްކޫލަކީ ބޯހިޔާވަހިކަން ހޯދުމަށް ބޭނުންކުރަމުންދިޔަ ތަންތަނެވެ. 

އިސްރާއީލުން ތަކުރާރުކޮށް އާންމު ރައްޔިތުންނަށް އަމާޒުކޮށް ހަމަލާދެމުން އަންނާތީ ހަމާސްއިން ވަނީ އެކަމުގެ ކަންބޮޑުވުން ފާޅުކޮށްފައެވެ. އިސްރާއީލުން ބުނަމުން އަންނަނީ އެތަންތަނަށް ހަމަލާދެނީ ހަމާސްގެ ހަނގުރާމަވެރިން އެތަންތަނުގައި ތިބޭތީކަމުގައެވެ. ނަމަވެސް މިއިން ކޮންމެ ހަމަލާއަކަށްފަހު ފުރާނަ ގެއްލިގެންދާ މީހުންގެ ތެރޭގައި ގިނައީ ކުޑަކުދިންނާއި އަންހެނުންނެވެ.