އެންމެ މީރު ކެއުމަކީ ކޮބާތޯ އަހާލާފިނަމަ ގިނަ ދިވެހިންގެ ޖަވާބަކަށްވަނީ ހަމަ ގަރުދިޔައާއި ބަތެވެ. އެއީ ކުރީގެވެސް، މިހާރުގެވެސް ޖަވާބެވެ. ކާބަފައިންގެވެސް ޖަވާބެވެ. ދިވެހިންނަށް ދުވަހަކުވެސް ދޫކޮށް ނުލެވޭނެ ޖަވާބުވެސް މެއެވެ. ބައެއް މީހުން މީރުވެގެން ދޭ ޖަވާބެކެވެ. އަނެއްބަޔަކު ސާދާކަމާއި އާދައިގެ ދިރިއުޅުމަށް ލޯބިކުރާކަން ދެއްކުމަށް ދޭ ޖަވާބެކެވެ.

   ޙަރަދު ކުޑަކުރުމާއި އިސްރާފު ނުކުރުމުގެ ވާހަކައެވެ. ދިރިއުޅުމުގެ ބޭނުންތަށް ފުއްދުމުގައި ވިސްނުންތެރިކަމާއިއެކު ބޭނުންތަށް ބަހާލައިގެން އުޅެންޖެހިފައިވާ ވާހަކައެވެ. މަޖަލަކަށް ހަދައި ޖޯކް ޖަހަންޖެހޭ ވަރަށްވުރެން ސީރިޔަސް ވާހަކައެވެ. ވިސްނާލަމާ ހިނގާށެވެ. އަމިއްލަ ދިރިއުޅުމާއި މެދުގައެވެ. ލިބޭ މުސާރައާއި މެދުގައެވެ. ކުރަންޖެހިފައިވާ ނުވަތަ މިހާރުވެސް ކުރަމުންއަންނަ ޚަރަދުތަކާއި މެދުގައެވެ.

   ޚަރަދުތައް ބަހާލަމާ ހިނގާށެވެ. ލިބޭ މުސާރައިގެ އެއްބައި ގޭގެ ކުއްޔަށް ދައްކަންޖެހޭ ނޫންތޯއެވެ. ނަގާފައިވާ ސައިކަލުގެ ޕޭމަންޓް ކޮންމެ މަހަކު ދައްކަން ޖެހޭ ނޫންތޯއެވެ. ފޯންބިލާއި، ކަރަންޓްބިލް އަދި ފެންބިލާއި އިންޓަރނެޓް ފީ، އަދި ކޭބަލް ފީ އަކީ ކޮންމެ މަހަކު ދައްކަންޖެހޭ ބިލްތަކެވެ. ބޭންކުން ނަގާފައިވާ ލުއިލޯނުތަކާއި މައިކްރޯ ލޯންތައްވެސް އަދި އެބަހުއްޓެވެ. މަހުގެ 15 އަށް އަރާއިރު މުސާރަކޮޅު ހުސްވެއެވެ.

ގޫގަލް ފޮޓޯ

   މިކަމަށް ބޭނުންވަނީ ދާއިމީ ހައްލެކެވެ. ވިސްނުންތެރިކަމާއިއެކު ދިރިއުޅުމަށް ގެނެވޭ ބަދަލަކުން ހޯދިދާނެ ދައިމީ ހައްލެކެވެ. ފަހުގެ ޖަމާނީ އުފެއްދުންތަކަށް ކުރާ ޚަރަދު ކުޑަކޮއްލަންވީއެވެ، އައިފޯން 14 އަތުގައި އޮއްވާ 15 ނުގަންނަންވީއެވެ. 55 އިންޗި ޓީވީ 65 އިންޗިއަށް ބަދަލު ނުކޮށް މަޑުކޮއްލަންވީއެވެ. ދުންފަތުގެ އިސްތިޢުމާލް ކުރުމާއި ވޭފް ކުރުން އަދި އެނާރޖީ ބުއިންތަކާއި ކޮފީތަކަށް ކުރާ ޚަރަދު ހުއްޓާލަންވީއެވެ.

   ހަރުދަނާ ވާންވީ ތިމާއެވެ. ޚަރަދު ކުޑަކުރަންވީ ތިމާގެއެވެ. ލިބޭ އެއްޗެއް ބަހާލައިގެން ދިރިއުޅުމުގެ ބޭނުންތައް ފުއްދަަންވީއެވެ. މުސްތަޤުބަލަށްޓަކައި ފަހަށް ރައްކާކުރަންވީއެވެ. އަމިއްލަ ދިރިއުޅުމުގެ ޒިންމާ އަމިއްލައަށް އުފުލަންވީއެވެ. އޭރުން ގަރުދިޔައާއި ބަތުގެ މީރުކަން އިޙްސާސްކުރެވޭނެއެވެ.