ޔުނެސްކޯ އާއި ޔުނިސެފް ގުޅިގެން އިންތިޒާމުކުރި 6 ވަނަ އޭޝިއާ-ޕެސިފިކް މީޓިންގ އޮން އެޑިޔުކޭޝަން 2030 ގައި ދިވެހިރާއްޖެއިން ބައިވެރިވެއްޖެއެވެ.

މި ހިނގާ ސެޕްޓެންބަރު މަހުގެ 10 އިން 13 އަށް ތައިލެންޑްގެ ވެރިރަށް ބެންކޮކްގައި ކުރިއަށްދިޔަ މި ބައްދަލުވުމުގައި ދިވެހިރާއްޖޭގެ ފަރާތުން ބައިވެރިވެ ވަޑައިގެންނެވީ މިނިސްޓަރ އޮފް ސްޓޭޓް ފޮރ އެޑިޔުކޭޝަން ޑރ. އަޙުމަދު މުޙައްމަދު، މިނިސްޓަރ އޮފް ސްޓޭޓް ފޮރ ހަޔަރ އެޑިޔުކޭޝަން އަޙުމަދު ޝަފީޢު އަދި ޑިރެކްޓަރ ޖެނެރަލް އިބްރާޙީމް އާސިފް ރަޝީދުއެވެ.

ހަތަރު ދުވަހަށް ދެމިގެންދިޔަ މި ބައްދަލުވުމުގައި ވަނީ "2022 ބެންކޮކް ސްޓޭޓްމެންޓް"ގެ ދަށުން އަޅާފައިވާ ފިޔަވަޅުތައް ދިރާސާކޮށް، ތަޢުލީމީ ދާއިރާއަކީ ވިލުނުވެރި، ޝާމިލް، އަދި ތިމާވެށީގެ ގޮތުން ދެމެހެއްޓެނިވި ދާއިރާއަކަށް ހެދުމަށް ކުރެވިދާނެ ކަންކަމާ ގުޅޭގޮތުން މަޝްވަރާކޮށްފައެވެ.

މި ބައްދަލުވުމުގެ މައިގަނޑު އަމާޒަކީ ދެމެހެއްޓެނިވި ތަރައްގީގެ ލަނޑުދަނޑިތަކުގެ ތެރޭގައި ހިމެނޭ 4 ވަނަ ލަނޑުދަނޑި- "ހުރިހާ ފަރާތްތަކެއް ހިމެނޭ ގޮތަށް ފެންވަރު ރަނގަޅު ތަޢުލީމެއް ކަށަވަރުކޮށްދީ، މުޅި އުމުރަށް އުނގެނުން ކުރިއެރުވުން"، ތަންފީޒުކުރުމުގައި ހުރި ގޮންޖެހުންތަކާއި، މައްސަލަތައް މުރާޖަޢާކޮށް، ކޮވިޑް-19 އަށް ފަހު ލަރނިންގ ރިކަވަރީއަށްއަށް މަގުފަހިކުރުވި ކަންކަމާއި އައު އިޖާދުތައް ދެނެގަނެ، ތަޢުލީމީ ނިޒާމާށް ހެޔޮ ބަދަލެއް ގެނެއުމަށް ކުރާ މަސައްކަތުގައި މަލްޓިލެޓަރަލް، ކްރޮސް-ސެކްޓޮރަލް، އަދި މަލްޓި-ސްޓޭކްހޯލްޑަރ އެންގޭޖްމަންޓް އިތުރަށް ހަރުދަނާކުރުމެވެ.

މި ބައްދަލުވުމުގެ ހަވާސާގައި ދިވެހިރާއްޖޭގެ ވަފުދު ވަނީ ސާކް ގައުމުތަކުގެ ތައުލީމީ އިސްވެރީންގެ 3 ވަނަ ޓެކްނިކަލް ބައްދަލުވުމުގައި ވެސް ބައިވެރިވެ ވަޑައިގެންފައެވެ.