2024 ވަނަ އަހަރުގެ ގްލޯބަލް އިސްލާމިކް ފައިނޭންސް ލީޑަރޝިޕް އެވޯޑް ދިވެހިރާއްޖެއަށް ލިބިއްޖެއެވެ.

ގްލޯބަލް އިސްލާމިކް ފައިނޭންސް އެވޯޑްސްއަކީ ދުނިޔޭގެ އެކި ކަންކޮޅުތަކުން އިސްލާމިކް ބޭންކިންގ އަދި ފައިނޭންސް ދެމެހެއްޓެނެވި ގޮތަކަށް ކުރިއަރުވަން މަސައްކަތްކުރަމުން އަންނަ ޤައުމުތަކާއި، މުއައްސަސާތަކާއި، ފަރުދުންގެ އަގުވަޒަންކޮށް ކޮންމެ އަހަރަކު ބާއްވަމުން އަންނަ ބައިނަލްއަގްވާމީ އިނާމުދިނުމުގެ ހަފްލާއެކެވެ.

17ސެޕްޓެމްބަރ 2024 ގައި ޕެރެޑައިސް އައިލެންޑް ރިސޯޓުގެ ވިލާ ނޮޓިކާގައި ބޭއްވި މި ހަފްލާގައި ރާއްޖޭއަށް ވަނީ' 14 ވަނަ ގްލޯބަލް އިސްލާމިކް ފައިނެންސް ލީޑަޝިޕް އެވޯޑު 2024' ގެ ޝަރަފުވެރި އިނާމު އަރުވައިފައެވެ. މި އިނާމު ރާއްޖެއަށް ލިބިފައިވަނީ އިސްލާމިކް ފައިނެންސް ކުރިއަރުވަން ރާއްޖެއިން މަސައްކަތްކުރަމުންދާ މިންވަރު ދެނެގަނެ މިހާތަނަށް ލިބިފައިހުރި ކާމިޔާބީތަކާއި މޭލުދަނޑިތަކުގެ އަގު ވަޒަންކޮށް ދެމެހެއްޓެނިވި ގޮތެއްގައި އިސްލާމިކް ފައިނެންސް ކުރިއަރުވަން ކުރަމުންދާ މަސައްކަތްތަކައް ބިނާކޮށެވެ.

މި އިނާމު ބަލައިގެންފައިވަނީ ރައީސުލްޖުމްހޫރިއްޔާ ޑރ މުހައްމަދު މުއިއްޒު ގެ ފަރާތުން ރާއްޖޭގެ މާލީ ވަޒީރު ޑރ. މުޙައްމަދު ޝަފީޤުއެވެ. އަދި ޑރ މުޙައްމަދު ޝަފީޤު މި ހަފްލާގައި ވާހަކަފުޅުދައްކަވަމުން ރާއްޖޭގެ އިސްލާމިކް ފައިނެންސްގެ ތާރީޚަށް އަލިއަޅުވާލައްވާ މިހާރު އިސްލާމިކް ފައިނެންސްގެ ނިޒާމަށް އައިސްފާވާ ބަދަލުތައް ފާހަގަކުރެއްވިއެވެ. އަދި ރާއްޖޭގައި އިސްލާމިކް ފައިނެންސްގެ ހޭލުންތެރިކަން އިތުރުކުރުމުގެ މުހިއްމުކަމާއި ރާއްޖެއަކީ އިސްލާމިކް ފައިނެންސްގެ ސަރަހައްދީ ނާރެހަކަށް ހެދުމުގެ ސަރުކާރުގެ ތަސައްވުރުވެސް ވެސް ވަނީ ހިއްސާކުރައްވާފައެވެ.

މި އިނާމުދިނުމުގެ ހަފްލާގައި ދިވެހިރާއްޖޭގެ އެހެނިހެން މާލީ މުއައްސަސާތަކުގެ އިސްވެރިންވެސް ވަނީ ބައިވެރިވެފައެވެ.