ދިވެހިރާއްޖޭގައި އިސްލާމީ މާލިއްޔަތުގެ ޚިދުމަތްތަކަށް ހުރި ޑިމާންޑު ވަރަށް މަތިކަމަށާއި، މުސްތަޤުބަލުގައި މި ސަރަޙައްދުގެ އިސްލާމީ މާލިއްޔަތުގެ މަރުކަޒަކަށް ދިވެހިރާއްޖެ ވެގެންދާނެކަމުގެ ޔަޤީންކަން އޮތްކަމަށް މިނިސްޓަރ އޮފް ފިނޭންސް ޑރ. މުޙައްމަދު ޝަފީޤު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ އަންގާރަ ދުވަހު ވިލާ ނޯޓިކާގައި ބޭއްވި ގްލޯބަލް އިސްލާމިކް ފައިނޭންސް ސަމިޓް އެންޑް އެވޯޑްސް 2024ގައި ދެއްކެވި ވާހަކަފުޅުގައެވެ.

މިގޮތުން މިނިސްޓަރ ޑރ. ޝަފީޤް ވިދާޅުވީ ދިވެހިރާއްޖޭގެ ފުރަތަމަ އިސްލާމީ މާލިއްޔަތުގެ ޚިދުމަތްތައް ފޯރުކޮށްދޭ އިދާރާ ކަމަށްވާ އަމާނާ ތަކަފުލް ޤާއިމުކުރިތާ މިހާރު 20 އަހަރަށްވުރެ ގިނަ ދުވަސް ވެފައިވާއިރު، އޭގެ ފަހުން ރާއްޖެށް ބޮޑެތި ކުރިއެރުންތަކެއް ލިބި، މިހާރު ފަޚުރުވެރިކަމާއެކު މޯލްޑިވްސް އިސްލާމިކް ބޭންކާއި، އެޗްޑީއެފްސީ އަމްނާ، އަދި ބީއެމްއެލް އިސްލާމިކް ފަދަ އެކިއެކި ފަރާތްތައް މެދުވެރިކޮށް އިސްލާމީ މާލީ ޚިދުމަތްތައް ފުޅާ ދާއިރާއެއް ފޯރުކޮށްދެމުންދާ ކަމަށެވެ.

މީގެ އިތުރުން، ގަވަރމަންޓް ސެކިއުރިޓީސްގެ މާކެޓްވެސް އިތުރަށް ތަރައްޤީވެ، އިންޓަރނޭޝަނަލް އިސްލާމިކް ޑެޓް ކެޕިޓަލް މާކެޓަށް ވަދެ، 2021 ވަނަ އަހަރު 500 މިލިއަން ޑޮލަރުގެ ސުކޫކެއް ސަރުކާރުން ވިއްކާފައިވާ ކަމުގައި މިނިސްޓަރ ވިދާޅުވިއެވެ. އަދި އެ ސުކޫކްގެ ޕޭމަންޓްތައް ގަޑިން ގަޑިއަށް ދައްކަމުން އައިސްފައިވާ ކަމަށާއި، ކުރިއަށް އޮތް ތަނުގައިވެސް އެކަން އެގޮތަށް ކުރެވޭނެ ކަމުގައިވެސް މިނިސްޓަރ ވިދާޅުވިއެވެ.

މިނިސްޓަރގެ ވާހަކަފުޅުގައި އިތުރަށް ފާހަގަކުރެއްވީ ރާއްޖޭގެ މާލީ ހާލަތަށް މިހާރު ކުރިމަތިވެފައިވާ ގޮންޖެހުންތައް ރަނގަޅު މާލީ އިސްލާހުތަކެއް މެދުވެރިކޮށް ހައްލުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މޭސްތިރިކަމުގެ ދަށުން ކުރައްވަމުން ގެންދަވާ ކަމަށެވެ. އަދި، އިސްލާމީ މާލިއްޔަތުގެ ޚިދުމަތްތައް ދޭ ސިނާޢަތް އިތުރަށް ވަރުގަދަކޮށް، އިސްލާމިކް ގްރީން ފައިނޭންސިންގެ ފުރުސަތުތައް ހޯދުމަށްވެސް ސަރުކާރުން މަސައްކަތް ކުރަމުންދާ ކަމުގައި މިނިސްޓަރ ވިދާޅުވިއެވެ.