ކުޅިވަރާއި ހަށިހެޔޮކަމާ ބެހޭ ވަޒީރު އިންޑިއާ އިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރްއާ ބައްދަލުކުރައްވައިފި އެވެ.
ކުޅިވަރު ވުޒާރާގައި އޮތް މި ބައްދަލުވުމުގައި ދެ ޤައުމުގެ ދެމެދުގައި ކުޅިވަރުގެ ދާއިރާއިން ގުޅުން ބަދަހިކުރުމާ ގުޅޭގޮތުން ވަނީ މަޝްވަރާކުރެވިފަ އެވެ.
އިންޑިއާ އަކީ ދިވެހިރާއްޖޭގެ ކުޅިވަރަށް ގިނަ އެހީތަކެއް ފޯރުކޮށްދެމުން އަންނަ ޤައުމެކެވެ. މިގޮތުން އިންޑިއާގެ ލައިން އޮފް ކްރެޑިޓް (އެލްއޯސީ) ގްރާންޓްގެ ދަށުން ގިނަ ކުޅިވަރު ވަސީލަތްތަކެއް އަންނަނީ ރާއްޖޭގައި ގާއިމްކުރަމުންނެވެ.
މިގޮތުން އެތުލެޓިކްސްއަށް ހާއްސަ ޓްރެކްތަކާއި ސްޕޯޓްސް ކޮމްޕްލެކްސްތައްވެސް އަންނަނީ އެކި ރަށްރަށުގައި ގާއިމްކުރަމުންނެވެ. މީގެ ކުރިން އެކި ރަށްރަށުގައި އައުޓްޑޯ ޖިމް އެޅުމަށްވެސް އިންޑިއާ އިން ގިނަ އެހީތަކެއްވަނީ ލިބިފަ އެވެ.
އިންޑިއާ ސަފީރު މުނޫ މަހާވަރްއާއިއެކު ކުރިއަށްދިޔަ މި ބައްދަލުވުމުގައި، އެކި ރަށްތަކުގައި ފަށާފައިވާ ކުޅިވަރު މަޝްރޫޢުތައް ނިންމުމަށް ކުރެވިދާނެ ކަންކަމާ ގުޅޭގޮތުންވެސް މަޝްވަރާކުރެވުނެވެ.
