ފުލުހުންގެ ބެލުމުގެ ދަށަށް ގެނެވޭ އުޅަނދުފަހަރާ ބެހޭ ގަވާއިދަށް މުހިންމު އިސްލާހުތަކެއް ގެނެސްފިއެވެ.
މި އިސްލާހުތަކުގެ ދަށުން، އުޅަނދުގެ ވެރިފަރާތަށް އުޅަނދު އަނބުރާ ހަވާލުކުރުމުގެ ކުރިން، އިތުރު ޝަރުތުތަކެއް ފުރިހަމަކުރަން ޖެހޭނެއެވެ.
އާ އިސްލާހުތަކާ އެއްގޮތަށް، އުޅަނދުގެ ވެރިފަރާތުން ދައްކަންޖެހޭ ޖޫރިމަނާއެއް އޮތްނަމަ، އެ ޖޫރިމަނާއެއް ދެއްކިކަމުގެ ލިޔުން ހުށަހަޅަންޖެހޭނެއެވެ. މިގޮތުން، ޖޫރިމަނާ ބަލައިގަތުމަށް ކަނޑައަޅާފައިވާ އިދާރާއަކަށް ފައިސާ ދެއްކިކަމުގެ ލިޔުން ހުށަހަޅަނޖެހޭނެއެވެ. އަދި ޖޫރިމަނާ ފައިސާ ދެއްކުމަށް ވަކި އުސޫލަކަށް އެއްބަސްވެވިގެން ފައިސާ ދައްކަމުންދާނަމަ، އެފަދަ އެއްބަސްވުމެއް އޮތްކަން އަންގައިދޭ ލިޔުމާއި، އެ އެއްބަސްވުމާ އެއްގޮތަށް ފައިސާ ދައްކަމުންދާކަމުގެ ލިޔުން ހުށަހަޅަންޖެހޭނެއެވެ.
މީގެ އިތުރުން، ދިވެހި ފުލުހުންގެ ޚިދުމަތުގެ ބެލުމުގެ ދަށަށް އެ އުޅަނދެއް ގެނެވުނު ސަބަބާ ގުޅިގެން ދައްކަންޖެހޭ ޖޫރިމަނާ ދެއްކިކަމުގެ ލިޔުންވެސް ހުށަހަޅަންޖެހޭނެއެވެ. ފުލުހުންގެ ފަރާތުން މި ގަވާއިދަށް ގެނެވުނު އިސްލާހުތަކަކީ ޤާނޫނު ތަންފީޒުކުރުމަށާއި، އުޅަނދުފަހަރާ ގުޅޭ މައްސަލަތައް ހައްލުކުރުމަށް އެޅޭ މުހިންމު ފިޔަވަޅެކެވެ.
