ދިވެހިރާއްޖޭގެ އިމާމުންނަށް ދިމާވާ ދަތިތަކަށް ހައްލު ހޯދުމަށާއި، އިމާމުންގެ ޚިޔާލާއި މަޝްވަރާ ހޯދުމަށާއި އިމާމުންނަށް މުހިއްމު ފިލާވަޅުތަކެއް ނަގައިދިނުމަށް އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދިޔަ އިމާމުންގެ މަހާސިންތާ ނިންމާލައިފިއެވެ.
މި މަހާސިންތާ ކުރިއަށް ގެންގޮސްފައިވަނީ 5 ދަންފަޅިއަކަށް ބަހާލައިގެންނެވެ. އެގޮތުން އިސްލާމީ ކަންތައްތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ނަންގަވައިދެއްވި ހާއްސަ ދަންފަޅިއަކާއި އިސްލާމީ މަރުކަޒުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފްގެ ހާއްސަ ދަންފަޅިއެއްގެ އިތުރުން، އިމާމުންނަށް ސިވިލް ސާވިސްގެ ޤަވާއިދުތައް ކިޔަވައިދިނުމަށްވެސް ހާއްސަ ދަންފަޅިއެއް ކުރިއަށް ގެންގޮސްފައިވެއެވެ. މީގެ އިތުރުން އިމާމުންނަށް ފިޤުހީ ގޮތުންނާއި އިދާރީ ގޮތުން މުހިއްމު މަޢުލޫމާތުތައް ދިނުމަށް ޕެނަލް ޑިސްކަޝަނެއްގެ އިތުރުން އިމާމުންގެ ޚިޔާލާއި ލަފާ ހޯދުމަށްވެސް ހާއްސަ ދަންފަޅިއެއް ކުރިއަށް ގެންގޮސްފައިވެއެވެ.
އިމާމުންގެ އަހަރީ ބައްދަލުވުން ނިންމުމުގެ ގޮތުން ވާހަަކަފުޅު ދައްކަވަމުން ވަޒީރު ވިދާޅުވީ، އިމާމުންގެ މަހާސިންތާގެ ތެރެއިން ނިމިގެންދިޔަ ކަންކަން ތަންފީޒުކުރައްވާނެކަމަށާއި، އިސްލާމީ ކަންތައްތަކާ ބެހޭ ވުޒާރާގެ 2025 ވަނަ އަހަރުގެ އެކްޝަން ޕްލޭނުގައިވެސް އިމާމުންގެ ފަރާތުން ލިބިލެއްވި ޚިޔާލުތައްވެސް ހިމަނުއްވާނެކަމަށެވެ.
އިމާމުންގެ މަހާސިންތާ 2024 ގައި ރާއްޖޭގެ އެކި ކަންކޮޅުތަކުން އިމާމުން ބައިވެރިވިއިރު އޮންލައިންކޮށް 400 އަށްވުރެ ގިނަ އިމާމުން މަހާސިންތާގައި ބައިވެރިވެފައިވެއެވެ. އަދި ހާޒިރުވެގެން މަހާސިންތާގައި 220 އިމާމުން ބައިވެރިވެފައިވާއިރު ޖުމްލަ 620 އިމާމުން ބައިވެރިވެފައިވެއެވެ.
