ޕަބްލިކް ފައިނޭންސް އިންސްޓިޓިއުޓުން އިންތިޒާމުކޮށްގެން އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި ނޭޝަނަލް ސެންޓަރ ފޮރ ދި އާޓްސްގެ މުވައްޒަފުންނަށް ނީލަމް ޕޯޓަލާ ގުޅޭ ތަމްރީނެއް ކުރިއަށްގެންގޮސްފިއެވެ.
މިއަދު ބޭއްވި މި ސެޝަން ނަންގަވައިދެއްވީ އެސިސްޓަންޓް ޓްރެޜަރީ މެނޭޖްމަންޓް އެގްޒެކެޓިވް، ހިޝާމާ ރަފީޤެވެ.
ތަމްރީނުގެ މަޤްޞަދަކީ ދައުލަތުގެ މުދަލާއި ފައިސާ ބެލެހެއްޓުމުގައި ޒަމާނީ ޓެކްނޮލޮޖީގެ ބޭނުން ހިފުމާއި، ނީލަމް ޕޯޓަލް މެދުވެރިކޮށް ދައުލަތުގެ މުދާ ވިއްކުމުގެ މަސައްކަތް ހަރުދަނާކުރުމެވެ. މީގެ އިތުރުން، ދައުލަތުގެ މުދަލާއި ފައިސާ ބެލެހެއްޓުމުގައި ޖަވާބުދާރީވުން އިތުރުކުރުމަށް މަގުފަހިކުރުމަކީވެސް މި ތަމްރީނުގެ އަމާޒެކެވެ.
ތަމްރީނުގައި ބައިވެރިންނަށް ނީލަމް ޕޯޓަލް ބޭނުންކުރާނެ ގޮތާއި، ޕޯޓަލްގައި މުދާ އަޕްލޯޑްކުރާނެ ގޮތާއި، ނީލަން ކުރިއަށް ގެންދާނެ ގޮތުގެ މަޢުލޫމާތު ދެވުނެވެ. އަދި ނީލަމް ޕޯޓަލް ބޭނުންކޮށްގެން ދައުލަތުގެ މުދާ ވިއްކުމުގެ މަސައްކަތް ކުރިއަށް ގެންދިއުމުގައި ސަމާލުވާންޖެހޭ ކަންކަމާ ގުޅޭ މަޢުލޫމާތުވެސް ހިއްސާކުރެވުނެވެ.
މި ތަމްރީނަކީ ދައުލަތުގެ މުއައްސަސާތަކުގެ މުވައްޒަފުންގެ ޤާބިލުކަން އިތުރުކުރުމަށް ޕަބްލިކް ފައިނޭންސް އިންސްޓިޓިއުޓުން ކުރިއަށްގެންދާ ސިލްސިލާ ތަމްރީނުތަކުގެ ތެރެއިން އެއް ތަމްރީނެވެ.
